Адыгнал хъуншагьру Майкопрай ялапар хъанахъисса дагъусттанлувтурал дянивгу, аьмну шикку ялапар хъанахъисса агьулданувугу, ххуйну кIулссар Дагъусттаннаясса лаккучу Аьлиев Аьли МахIаммадшариплул арснал цIа. КIулссар ванал дуллалисса дугърисса тIуллайну ва жяматийсса иширттаву чялишсса гьурттушиннарайну.

Майкопрай Аьлил, Хъунмур теннисрай буклансса комплексгу бувну, сакин дурну дур ва спортрал журалул федерация. Ва цувагу ур Адыгнавусса Хъунмур теннисрал федерациялул каялувчи. Гьарца шинах ванал сакиншиндаралу шикку дайссар халкьуннал дянивсса ва Аьрасатнал лаваймур даражалийсса теннисрал турнирду.
«Укунсса зула ватанлувная, цинявннал хIурматрайсса лаккучуная зухьгу бусан ччай бур», – тIий, ттучIан телефондалийн оьвкуна Адыгнал Республикалийсса Дагъусттаннал ХIукуматрал вакилнал кумагчи Икрам Велиевлул. Ванал бусаврийну, Майкопрай вайннал сакин дурну дур Дагъусттаннал Музыкантътурал союзрал хъунама, гьунар бусса пианист Хан Башировлул творчествалун хасъсса батIаву. Шикку хъунна­сса гьурттушинна дурну дур Аьлил­гу. Цайми регионнай Дагъус­ттаннал цIа бюхттул дуллали­сса жула агьалинал давурттан багьайсса кьимат бишлай, Дагъус­ттаннал миллатирттал политикалул ва диннал иширттал министр Энрик Муслимовлул тавакъюрайну, Майкопрайсса вакилханалул гьурттучитуран уттигъанну дуллуну дур наградартту ва барчаллагьрал чагъарду. Вайннавух Аьли­гу лайкь хьуну ур «За укрепление мира и согласия» цIанилусса хIурматрал грамоталун.
ЦIуссалакрал райондалий увну, хъуна хьусса Аьли оьрчIнияцIава спортрах гъира бусса, хаснува боксрай уклай, чIаважагьилтурал дянивсса турнирдай хьхьичIунсса кIанттурду бугьлай, республикалул даражалий цалла райондалул цIа гьаз дуллалисса, хIарачат бусса жагьил ивкIун ур.
Ванал нину-ппугу, МахIаммад­шарип ва Зулпа, ЧIяйннал шяравату бизан бувсса, ЦIуссалакрал район ччаннай дацIан дурсса, захIмат ккавксса халкь бивкIун бур. Хъун дяъвилул гьурттучи МахIаммадшарип махъсса шиннардий ивкIссар Буйнакскаллал Ветерантурал советрал председательну. Зулпагу оьрмулул 15 шинаву, захIматрал армиялуву гьурттуну бивкIсса, кьянкьасса зунттал хъамитайпа бивкIун бур. Укунсса нитти-буттал тарбиягу увну, хъуна хьусса Аьлил цала оьрмулул ххуллугу бивтун бур так цала захIматрайн чул бивщуну.
Школагу къуртал бувну, Аьлил къуртал бувну бур Буйнакскаллал шяраваллил хозяйствалул техникум, дуккаврил дянив кIира шинайсса аьралий къуллугъгу лавхъун. Муния махъ вузравун дуклан уххансса пикрилий лавгун ур Дянивмур Азиянавун, хаснува Туркманнавун. Шиккугу, боксрай уклай, хьхьичIунсса кIанттурду ласласисса жагьил кьамул увну ур Туркманнал цачIундур командалувун. Совет Союзрал хъуни-хъунисса турнирдай, первенствардай гьуртту хъанай, ххуйсса ккаккияртту дуллай ивкIун ур. Оьрмулул 24 шинаву ванан бокс кьабитан багьну бур ва машхул хьуну ур ишбажаранчишиврухун. ХIукумат даххана хьусса ва цаймигу политикалул ишругу сававну, 1996 шинал ва цала кулпатращал Аьрасатнавун ивзун, миналул хьуну ур Самарскаллал областьрайсса Тольятти шагьрулийн. Ва чIумал ванал бивкIун бур душ ва оьрчI. 1999 шинал Дагъусттаннайн къачагътурал бандформированияртту ххярхсса чIумал, Аьлигу тиха занахьуну, ополчентуравух гьурттушинна дурну дур. Дяъвигу къуртал хьуну, паракьатсса оьрму хIасул хъанан бикIайхту, гьарма цала-цала минардайн, давурттайн зана бивкIсса ппурттуву, Аьлил пикри бувну бур кулпатращал чил хIукуматрай ялапар хъанан гьан. Ванил сававгу диркIун дур душнил  Хъунмур теннисраясса хиял. Тольяттилий душ теннисрай буклай бивкIун бур 7 шин хьуния шийнмай. Дазул кьатIув вания хьуну бур цимирагу турнирданул чемпионка, гьурттуну бивкIун бур хъаннил цачIундур командалувухгу. Чил билаятрай 8 шингу дурну, вайннал кулпат 2009 шинал Аьрасатнавун занахьуну бур ва хъунама уссу ялапар хъанай ивкIсса Майкопрай миналул хьуну бур. ЦIана  Майкопрай буттал тIивтIусса Хъунмур теннисрал комплексрай тренерну зий бур. Аьлил арсналгу ккарччал хIакиннал пиша лавхьхьуну бур, зий ур Краснодардай.
Майкопрайсса циняв дагъусттанлувтурангу, Аьлингу чIиримур ватандалул цIа лахъа-хъун дуллалаврил ххуллий дуллалисса давурттаву чIа учин ччай бур тIайлабацIу ва каши-кьудрат ххи шаву.
Залму АьбдурахIманова