Февраль зурул 28-нний 3 шин хьунтIиссар МахIмуд Чаннановлул чувшиврий жан дуллуну. Февраль зурул 17-нний Каспийскалий, Анвар Аджиевлул цIанийсса 12-мур гимназиялий, чувшиврий СВО-лий жан харж дурсса Чаннанов МахIмудлул «Виричунал парта» тIитIлатIисса мероприятие хьунни.
ДакIнийн бутанну, Маликлул арс МахIмуд Ккуллал шяравасса ушиву, СВО-лий жан дуллусса цалчинминнавух ушивугу. 2022-ку шинал, февраль зурул 28-нний Харьковрал областьрай Купянск тIисса шагьрулийсса талатавриву жан кьурван дурсса МахIмудлун Чувшиврул орден дуллушивугу.
Ванал оьрмулул ххуллия, гьунардания бувсунни гимназиялул дуклаки оьрчIал, дурккунни назмурду. «Виричунал парта» тIитIаврил лишанну хъанахъисса лента кьувкьунни МахIмудлул ниттил Шамсият Оьмаровал ва школалул директор Хайрулла Мурзаевлул.
«Ца акъа-акъасса арснацIа хьусса, щалла дуниял ва ца арснайну чIюлу дурну диркIсса ниттин, Шамсият Ризвановнан, цукун захIматну буссарив жунма бувчIлайгу, чIалайгу бур. Ванил къювулий ка дишин ванищал бувкIсса, виртталсса арсру ливтIусса ниттихъал дакIругу хIакьинугу, гьар кьинигу гьулусанну душиву кIулли. Жунма цинявннан мудангу дакIний битан аьркинссар, вайннал арсурваврал Аьрасатнал мурадру буруччаврил цIаний жанну ххира къадуршиву. Укунсса мероприятиярттугу оьрчIаву патриот асарду цIакь буллалисса давур, вара ххуллийсса давуртту гимназиялий гихуннайгу дуллантIисару», – увкунни директорнал.
Шамсиятлул барчаллагь увкунни асрнал аьпа уттава буллалисса даврихлу. «Дурагу 21 шин дия ттул МахIмудлун, аьрая учIайхту щар дуцин, оьрчIру бувну хъуни буллан хияллай уссия, цаймигу хияллу чIявусса бия ванал, оьрмугу, инсанталгу ххирасса ия. Ниттилгу, щилчIавгу дакIнин асар хьунсса махъ учайсса акъая, инсаннан къаччан бикIан бансса тIул дайсса акъая. МуницIухва, зунттал кIанай хъуна хьусса МахIмуд (ттул нитти-буттачIа Ккулув) кьянкьа-кьурчIину тарбия хьуссия. Ванан ттущалсса ихтилатраву илгьан бия, цува аьралий задание бартдигьин нанийни зана къахьунгу бюхъайшиву. ТIайланма къаучирчагу, бувчIин бувна, цува связьрайн къауккантIисса иш хьун бюхъайшиву. Укун сивсуну бивкIулул хьувун бачайсса вирттал бур жулва. Ва февраль зурул 28-нний 3 шин хьунтIиссар ттул МахIмуд дунияллия лавгун. Утти жун, ниттихъан ливчIсса мурад цар бусса, жулва дакIурдил куртIнива тачIавгу къабуккайсса ва къабуккантIисса жул арсваврал цIарду хъама къаритаву. Аьпа баннав, алжан булуннав жул арсвавран. Ва ххуллий, «Вирттаврал партарду» тIитIлай, укунннасса журалул цайми давуртту дуллай буминнайнгу барчаллагьрай буру. Мукьахунмай СВО-лий бусса жулва чиваркI цIунцIия къархьуну, цIуллуну ичIувацириннал ялун, шаппа-шаппай бучIансса кьудрат Аллагьнал дулуннав!», – увкунни Шамсият Оьмаровал.
ПатIимат Рамазанова
