Октябрьданул 18-19-нний, бигьалагай кьинирдай, МахIачкъалалив хьунни шяраваллил хозяйствалул бакIлахъиялул ярмарка. Ва сакин дурну дия ДР-лул Шяраваллил хозяйствалул министерствалул ва МахIачкъалаллал администрациялул цачIуну.
Пушкиннул кучалий паркрачIан дияннин, кучалул кIивагу чулух, дахлай бия ссуттил ахъулсри ва ахънилсри, аьнакIив, индушкIартту, чавахъ, нис, лагаву, ницI ва цаймигу сурсатру. Белоруссиянал яннарду ва усру, гьивхь ва Аьрасатнавасса ницI дахлай бия Сулайман Стальскийл кучалий, Хъунмур библиотекалул чIарав.
Аьмну ласурча, ярмаркалийсса бакIлахъиялул багьри базаллувуминнул даражалийсса бия.
Оьлил нис дия 450-600 къурушран кило. НицIал багьа бур базаллуву 1000 къурушран кило, ярмукIалий тIурча – 1200 къурушран кило (масалдаран, УнцIуллал райондалиясса ницI). Аьрасатнал регионная дуркIсса ницIгу, жуламиннал кунна, ххира дурну дур: утти тайнналсса дур 1000 къурушран кило (хьхьичIра дикIайва 700-800 къурушран). Индейкалул багьа бия 500 къурушран кило, мува багьлун дахлай бикIай цIусса шинал хьхьичIсса гьантрай базаллувугу.
Гава базаллул багьлий бахлай бия чавахъгу: сазан, толстолобик ва цаймигу журалулсса, 270-300 къурушран кило.
АьнакIив бахлай бия 220 къурушран кило. Миннул хъирив яржагума бувгьуну бия инсантурал, мува багьлий бахлай бур ттучаннайгу. «Магнитраву», масалдаран, бур аьнакIив 220 къурушран кило.
ХьхьичIми шиннардийсса ярмаркарттай 2-3 машиналий ризкьилул дикIгу дикIайва дахлай, уттисса ярмаркалий дикI дакъая.
ХьхьичIми шиннардий ярмарка дуван хьхьичI ДР-лул Шяраваллил хозяйствалул министерствалул баян байва дукиялул сурсатирттал багьри базаллувуминнуяр 10-20 процентрал кьювкьуну бикIантIишиву. Ва ххуллухьрив, мукунсса баян бавугу къадуруна, багьригу заллухъруннал цанма кьамулсса куццуйсса бивхьуну бия. Ярмарка даврил мяънагу, мурадгу инсантуран чансса духьурчагу бигьашивугу, хIаллихшинна хьун даву дакъарив. Мунияту ярмаркардайсса багьригу, жул пикрилий, бикIан аьркинни базаллувуминнуяр чансса бунугу ялавайсса.
