Ларгсса нюжмаркьини МахIачкъалалив, Оьруснал театрданул чIивимур залдануву, «Махачкалинские известия» кказитрал 35 шинал юбилей лахъа-хъунну кIицI ларгунни.

1991 шинал июльданул 6-нний бувкссар дунияллийн ва кказитрал цалчинмур номер. Тай паракьат дакъасса, Горбачевлул перестройкалул ппурттувусса шиннардий, шагьрулуву хъанахъимуния агьалинахь тIайлану буслансса, балжисса информация ппив буллансса, агьамсса масъалартту аьнтну гьаз буллансса кказит аьркинну бушиву бувчIуну, та чIумал шагьрулул советрал председательну зузисса Сиражуттин Илиясовлул хIукму бувссар итабакьлан. Ва хIуччалий чIурчIав дунни, залданувун бавтIцири барча буллай, МахIачкъалаллал мэр Жамбулат Салавовлулгу.
БавтIцири барча бунни цифровой развитиялул, информациялул ва печатьрал министрнал кIанттайсса Юрий ХIамзатовлул, Дагъусттаннал Журналистътурал союзрал хъунама МахIаммад Ибрагьимовлул, Халкьуннал Мажлисрал комитетрал каялувчи Фирудин Раджабовлул ва цаймигу бусравсса инсантурал.
Дагъусттаннал ХIукуматрал ва Халкьуннал Мажлисрал цIанияту, мукунма шагьрулул администрациялул ва Журналистътурал союзрал цIанияту Барчаллагьрал чагъарду, ХIурматрал грамотартту ва бахшишру дуллунни хьхьичIунсса журналистътуран.
Культуралул программалуву гьартту хьунни республикалул эстрадалул чаннацIуртти.
Ва мероприятиялий гьуртту хьунни «Илчилул» коллективгу, хъунама редактор Руслан Къардашов бакIчину.
ДакIнийхтуну барча буллай буру цал уттигу даврил уртакьтал, чIа тIий буру шагьрулул агьалинал оьрму гьаз бувансса къулайшиннардая, хьхьичIуннайшивурттая ва ххуйшивурттая чIярусса макьалартту чичлансса сантгу, бюхъугу!
ПатIимат Рамазанова