Аьрасатнал Конституциялул кьини МахIачкъалалив хьунни «Душа Дагестана» тIисса Дагъусттан Республикалул премия дуллалисса шадлугъ. Премия дуллунни ДР-лул культуралул министр Зарема Буттаевал.
– «Душа России» ва «Душа Дагестана» тIисса премиярттал тасттикь буллалиссар билаятрал ва республикалул тарихрал аьпа, маданиятрал код ябаврил чулухуннай хъуннасса къулагъас душиву. ХIакьину ва залданувун бавтIун бур жула аслийсса маданият ядаврил ххуллий захIмат буллалисса инсантал. Зу – агьаммур аваданшивуру, – увкунни министрнал.
Зарема Буттаевал барчаллагь увкунни Республикалул Халкьуннал творчествалул къатрахь, республикалул фольклорданул магьирлугъ, халкьуннал творчество, сянатру хьхьичIуннай даврил ххуллий зий бушиврухлу.
Премия «Душа Дагестана» дуллай байбивхьуссар 2012-ку шинал ва тания шиннай дулайссар гьарца шинах Аьрасатнал Конституциялул кьини.
Уттинин ва премиялун лайкь хьуну ур 172 инсан, цивгу шагьрурдал ва районнал магьирлугърал идарарттай, творчествалул коллективирттаву зий, аслийсса культура, халкьуннал магьирлугъ ядаврил, оьрчIал ва жагьилтурал художествалул творчество хьхьичIуннай даврил цIаний чIярусса шиннардий захIмат буллалисса.
«Аьдатравун дагьсса халкьуннал магьирлугъ» номинациялий «Душа Дагестана» премиялун лайкь хьунни Лакрал райондалул Магьирлугърал центрданул директор, «Вайлар» тIисса хъаннил балайлул ансамбльданул каялувчи Мариян Жамалуттинова.
Халкьуннал творчество ва аслийсса культура, ягу дурну, хьхьичIуннай даврил ххуллий буллалисса захIматрахлу ДР-лул ХIукуматрал ванин дуллунни ХIурматрал лишан. Мариян Жамалуттинова ккаллину бур халкьуннал ва ттизаманнул ца яла хьхьич1унсса балайчинан, ляличIисса чIунил залуннан.
2012-ку шиная хIакьинунин ва бур «Вайлар» группалул каялувчи ва «Гъази-Гъумучи» ансамбльданул солистка. КIирагу ансамбльданул чялишсса гьурттушинна дайссар республикалул лагрулийсса фестивальлай, фольклорданул байраннай.
Барча, Мариян, вин бивщусса лайкьсса кьимат!
