ЦIакь хьусса аьдатрайн бувну, гьарца шинал мартрал ахирданий жулва билаятрал библиотекарттай дувайссар «ОьрчIал ва чIава жагьилтурал луттирал нюжмар» – луттирду ххираминнал байран. Хьунни ва Гъумук ОьрчIал библиотекалийгу. Ванил сакиншинначину бия библиотекалул хъунмур Зарема Исяева.

«ОьрчIал ва чIаважагьилтурал луттирал нюжмар» дайдихьлахьисса «Книжкины именины» цIанилусса шадлугъ дачин дурну бия ЦБС-рал директор Мариян Аьшаева. Ванил Гъумучиял «Солнышко» тIисса оьрчIал багърал хъунмур группалул тарбиялувтурахь бувсуна ва байрандалул тарихрая. Цалчинна-цалчинсса Нюжмар дурну дур Москавлив Колоннардал залдануву архсса 1943-ку шинал. Дяъвилул захIматсса шиннардий оьрмулул хъуниминнал мюрщи оьрчIан укунсса байран дурну диркIун дур. Гания шиннай ва Нюжмар аьдатравун дагьну дур.
Шадлугърайннин библиотекалул читальный залдануву хIадур дурну дия луттирдал «Листайте нас, читайте нас, и мы всему научим вас» тIисса цIанилусса выставка. Мариян Аьшаевал кIул бунни оьрчIру ва выставкалийсса луттирдащал – К. Чуковскийл, П. Ершовал, А. Пушкиннул ва чIявусса цаймигу чичултрал тяхъасса произведениярттащал. ОьрчIру хъунмасса гъирарай гьуртту хьунни «Да – Нет» тIисса цIанилусса тIуркIулийгу, ссигъри бувчIлачIисса ва цаймигу хIазсса тIуркIурду буллалисса программалийгу.

«Лу ххирану бикIира, ванил зул оьрму бигьа бантIиссар, дусшиврийсса кумаг бувантIиссар пикрирдал, асардал, иширттал яргсса ххарахрулува буккан, лахьхьин бувантIиссар зулва зувагу, цайминналгу хIурмат буллан, луттирал зул аькьлулий ва дакIний дунияллухсса гъирарал хъару ххяххан дувантIиссар», – увкуну бур Максим Горькийл. Ваналва увкуну бур: «Ххуйсса лу – му хъуннасса байранни» куну. Вайгу мисалданун бувцуну, Мариян Аьшаевал чIурчIав дунни луттирду ккалаккаврил агьамшиврий ва оьвчаву дунни оьрчIайн мюрщиниява луттирду ккалаккаврихун багьан.
Гьарцагу оьрчI чIири-хъунсса бахшишран лайкь хьунни.
Ахирданий хъунмур группалул тарбиячи Айзанат Чупалаевал барчаллагь увкунни библиотекалул зузалтрахь оьрчIан хъунмасса мюнпатсса даву даврихлу.
Бадрижамал Аьлиева