Дагъусттаннал ва Аьрасатнал машгьурсса композитор, Дагъусттаннал магьирлугърал лайкь хьусса ишккакку, республикалул паччахIлугърал премиялул лауреат Заурбаг Жанаев Дунияллул халкьуннал дянивсса конкурс-фестивальданий цалчинмур даражалул дипломран лайкь хьунни.

Творчествалул, культуралул­ ва кIулшиву дулаврил хьхьи­чIуннайшивурттал дунияллул выставкалул «ART EXPO ABU DHABI – 2026» лагрулий хьусса ва конкурсрал хIасиллу дурну дур Дубайлив.

М.И. Глинкал цIанийсса Нижегородуллал консерватория къуртал бувсса, Аьрасатнал Композитортурал союзрал, Театрданул ишккаккултрал союзрал ва Журналистътурал союзрал членнугу усса Заурбаг Жанаев уттиннингу ххув хьуссия цIанихсса конкурсирттай. Япониянаву, Токиолий хьусса Дунияллул халкьуннал «Japanese Stars» конкурсрайгу 1-мур даражалул дипломран лайкь хьуссия. Мукунма Европанал Культуралул ассоциациялул конкурс-фестивальданий Парижлив Гран-при ларсъссия. Цаймигу дур гьунар бусса композиторнал оьрмулуву ккалли дансса хьхьичIуннайшивуртту.
ДакIнийхтуну барча буллай буру Заурдул хIалал бувсса диплом, чIа тIий буру ялуннайгу ххуй-ххуйсса ккаккияртту!

ПатIимат Рамазанова