25 шинал хьхьичI, 1999 шинал, хар-хавар бакъа ЦIуссалакрал райондалийн дунияллул террористътурал кьюкьри ххярхсса тарихрал иширан хасну кказитрай рирщусса язиязими макьалартту.

Грознайлин, полевой ко­ман­дир­турачIан бияннин, цила ласнах, ЦIуссалакрал РОВД-лул зузалах (ва Чачаннал террористътал ЦIуссалаккуйн ххявхсса ппурттуву вышкалий гузат буллай уна заложникну увцуну лавгссия), луглай лавгсса хъамитайпа бур тIий ЦIуссалаккуй, жу кIийла-шамийла гихун лавгру мунищал хьунабакьин, амма жуща му лякъин къавхьуна, жагь Чачаннавун, жагьгу цайми шагьрурдайн лавгссар тIий. Тти­гъаннугу гихун лавгсса чIумал, ЗАГС-рал хъунмунил, Роза Акаевал, бувсуна му хъамитайпа цилва ссу бушиву, цуппагу, аппендицитрай операция бувну, Каспийскалийсса азарханалий бушиву.
Жу Каспийскалив Миясатлу­чIан бивну, азарханалий цуппа цуксса инжитну бунугу, дакIнин бичавурттал мунил дакI хъиннура къумалаган дуллантIишиву бувчIлай бунугу, тавакъю був­ссия мунихь цила хIалкьазиялия, бакIран ккавкмуния бусаву.
Ва заэвсса лакку хъамитайпалул чувшиврул ласурваврал хъирив Ссибирнавун лавгсса декабристкахъул хьхьичI бацIан барчагу, Миясатлулмур чувшиву ца мискьалданул дунугу декабристкахъалмурнияр ларайну чIалай дур – Миясат ласнах луглай лавгун бур дяъвилул цIу къизгъиннийх, ттупал ххурххулувух ххуллу лавсун. Ва цуппа, циламур дард ххину, дяъви лагмава най бивкI­шиврий личIину чIурчIав къадулларчагу, ванил ссурвал буслай бия Миясатлун ккуллардаща лабикIан цимилагу столданул лув буххан багьшиву, га боевиктуралгума цимилагу цащалва бомбоубежищардавун ххюрхху бувшиву. Утти ваних цихра вичIи дишинну:
— Ттул лас, АхIмадов Кьурбан Пашаевич (1964 шинал ув­сса), сентябрьданул цалчинмур кьини ивтуна вышкалий къарал буллан. Сентябрьданул 4-нний, даврил смена дайдирхьуну лавгсса чIумал, ванащал вышкалий ивкIун ур ххюя милица, гьаннайсса, ацIния шама инсан къуллугъ буллан аьркинсса кIанаву, увагу ряха. Бущихъав, ЦIумадав ххявххун, ЦIуссалаккуйнгу ххя­ххан­тIиссар тIисса хаварду мудангу баллай бунува, отпускавагу къалавсъссия ттул ласнал дукIу, ххишалдаран, та дяъви байбишин хьхьичI хъинну къашавай уссия, пострай аьвкъуну. Больничныйлийнвагу уккан итлай акъая, укунмавагу милицалт биял хъанай бакъар тIий. Цувагу даврийн муксса дакI тIайлану икIайвахха, халкь чанну бур тIий, цалла цIуллу-сагъшиврулсса бансса чIун дакъана ия.
Ттул ласгу, танащал къарал буллалисса милицалтгу бусса вышкалул лагма бикIан аьркинну бивкIун бур кьутIай кIунурду, мигу бакъассия. 500 метралул радиусрайх итадакьайсса сигнал дулай ракетарду дикIан аьркинссия, мигу къадиркIун дур. Ялагу вышкалул лагмахалу, минарду дурччуну, мюхчан бувну бикIан аьркинну бивкIссар. Ми ца зат къадиркIун дур.
Лагмасса вацIраву боевиктал батIлатIисса кIулнугу бунува, баябанну ва куццуй кьабивтун бивкIссар вышкалийсса милицалт.
Утти щалла дардгу, сси-къащигу ттунгу, ттул мюрщисса шанма оьрчIангу ккухIлан багьлай бур. Хъирив буклай, аслу-суал буллалийнигу, Чачаннаву «Под бомбежку попал», «Расстреляли» учай. Ва куццуй, ур, акъар тIий, ттула оьрчIал буттал бакI­рачIан бувкIмур кIул бан къабюхълай бура. Ссахлунур ттул ласнал цалла жан харж дурсса, мукун хьуну бухьурча иш? Ци тахсирди ттул оьрчIай хьусса, вайннал ялату ппу ласун? Ттун цичIав къакIулли.
Цалчинсса гьантрай му Чачаннаву ивкIун ур ЦIусса­лаккуявасса цама милицанащал, Ккурккиев Аьлищал, ца лагерьданий. Ца кьини, кIюрххил ссят шамунний, «Кьурбан, твой час настал» увкуну, увцуну лавгшиву бувсунни Ккурккиев Аьлил. Ци барду мунан, чуври му тIий, суал бувукун, Ккурккиев Аьлихьгу увкуну бур: «На обмен увезли» увкуну. Ялагу суаллу буллалийни, кIа нукIува увкусса куццуй, «Расстреляли», «Под бомбежку попал» тIий бия тIар. Сентябрьданул 5-нний, боевиктал ЦIуссалаккуйн бувххун нанисса чIумал, ттул 9 шин хьусса душ буссия азарханалий уттубивхьуну, аьрчча тIий ччаннай бацIан къахъанай.
Къатлувату бувккун най бунува оьвчав вышкалийн ласначIан, боевиктал бувххунни шяравун тIий. КIанал жаваб дия ми оьрусри, ми бучIан аьркинссия тIисса. На чIирттугу бур, ттупангругу ссукIа битлай, «Аллагьу Акбар» тIий, най бур куну учав.
Цаппара хIаллава боевиктал вышкалул лагма ругьлан бивкIун бур. Шанттурша боевик вышкалийсса ряха инсаннайн гьужум буллай авчуну ур. АхIмад Кьурбановлуйн ккулла щуну мукьах, увагу шама инсан ливчIун ур 300 боевикнайн данди авцIуну.
Ттун кIулли ва оьрмулуву тIайлаш­иву дуссарив, дакъассарив. КъакIулли, чуврив муних луглантIиссавагу?
Цал дахьва ЦIуссалаккуя лихълахъисса чIумал, ттучIан инсантал «махънахьхьун цIуллушиву дулуннав» тIий букIлай бия. Яла щиллив увкунни вышкалиясса АхIмадов Кьурбангу, Кьурбанов АхIмадгу Хасавюртлив азарханалийн биян барду куну. Тиккугу луглай бивкI­ссара. Азарханалий гьарица кIанаву цIухла бивхьуну мукьах, лавгра, ттухьва бу­къаслай, ивкIуну, моргравун иян увнувагу акъар­вав, тIий, луглай. Моргравун бухлахийни увкунни, шиву бивххун бивчусса ряха инсан ур, инава хIал бивну багьара куну. Гивугу къалявкъунни. Морграву ливтIу­миннал сияхI ххал дуллалийни бакIрайн агьу­на ЦIуссалакрал прокурорнал хъиривма Мурад. Мунайн барчаллагьрайнма бикIара, хъирив излай, цащава шаймургу бай, уттигу цIухлайна икIай.
Яла, морграву къалякъайхту, увччунувагу акъарив ххал уван, Хасаврайсса хIатталлив лавгра, гиккугу къалявкъунни.
Ца ппурттуву гийх, ЦIуссала­ккуй, чIаххуврай ялапар хъанахъи­сса чачан оьрчIру гъан хьуну увкуна: «Вил лас сагъну уссар, жулва яруннин ккав­ккунни боевиктурал, къуннагърал хьхьичI авкьуну, Зандакьуллал чулухунай увцуну най. Ца ччаннахгу аьрччану ия, кагу чIувин дурну дургьуну най ия, канийн ккулла щусса, тагьар дунуккива», — куну. БакIгу бурувххуну бунуккива тIий бия. Га увцуну нанисса боевиктурачIан гъан хьуну, чIаххул: «Му ялгъузсса кулпатравасса оьрчI­рича, итаакьияра» тIий бивкIун бурча, «Букьияра хьхьичIа, зуйнмагу бикъавтнува» кунни тIий бия. Гиккувасса штабрайн лавгун, чIаххувоьрчIал хIарачат бувну бия, «Му хъунмасса кулпат ябаншиврулли милицану зун лавгсса, итаакьияра» тIийча, «Му командиртурахьхьун иривссар, иш захIмат хьуссар» тIий бия тIива. ОьрчIал му хавар бусайхту, на, ЦIуссалаккуйнмай зана бивкIун, Шамил Басаевлул штаб лявкъуну, ганахь, «Ттул милицану зузисса лас увгьуну усса ур» учав, хIалкьазиягу бувсун, хъювсулсса чIуний миннат бував, итаакьияракьай куну. Басаевлул, аякьалийсса яхши-хашгу бувну, цIана вертолетру бомбарду бич­лантIиссар, ина чун бувкIрагу куну, бувчIин бунни цалламур кьюкьлул гикку ца Ккурккиев Аьли акъа къаувгьушиву. «Тамур къирагърай цамур штаб буссарча, тикку цIуххин насу» увкуна. Тамур штабрайн лавгукуннив, цаннал увкунни, «Вышкалийсса ряхагу инсан итаавкьуссар» куну, яла цаманал вышкалиясса ца лахъ-лахъсса, лухIи-пурщисса, ссирссилттугу дусса адимина угьарду кунни.
Итаакьияракьай тIий, миннатирттахун багьувкун, бувсунни тихунай увцуну лавгшиву. На махъунмай занабикIлакIисса чIумал, вертолетру, дурккун, битлан диркIунни, боевикталгу луглан бивкIунни, навагу, га ккуллардал чявхълуща ххассал хьуну, Хасавюртуллал шанбачIулийн бивукун, ца чачан адимина гъан хьуну: «Вил адимина Гелянив ­уссар» кунни. ЦIуссалаккуйхчIин гьан бюхълай бакъахьувкун, ганал ттухь Новогроз­ненскалийхчIин насу увкунни, Герзеллайн бияннин цалва биян бувунна. Гичча яла, жагь таксилий, жагь бахьтта, бивра Зандакьлив. Зандакьлияту Веденолийн бувцуну лавгсса хавар бия. Зандакьливсса чIявусса жагьилтуралгу (лас кIулсса ги­кку тамансса буссар) хIарачат бувну бур, ми итабакьияра тIий. Боевикталгу, кув итабакьин рязи хъанай, кув къахъанай, цалийн къабувкIун бур. Шанма ккулла щусса щавурдугу гиччавасса хIакиннахь дахIин дурну дур. Га хIакиннал жухь бувсуна Кьурбан, цIалцIи щуну, кIулшилия лавгун унува, боевиктурахьхьун иривну ивкIшиву.
Га кьини Веденолийн нава къабиян най чIалай, ахттакьунмай ЦIуссалаккуйнмай зана бивкIун бувкIра. Хъиривмур кIюрххил ласнал ссу бувкIунни, аьгу-аьтIий: «Бачу, вила ласнал нурчIи ларсун бувкIун, жунавагу ккаккан къаивтун, Ккулувва увччуннича» тIий. Нагу, дахьва лахьхьу Зандакьлия бувкIра, Зандакьуллал агьулданун му сагъну ккавккун ия, ттул лас къаивкIуссар тIий, вев-гьарайлий бура.
ЦIуссаккулув най бунува, хьунаавкьунни РОВД-лул хъунама Муслим Даххаев. На ганахь суал бав: «Зу цу уччарду?» куну. Ганалгу: «АхIмадов Кьурбан уччарду», — кунни. Бусав ганахьгу ттула лас сагънува ушиву, га лахьхьу-цархьхьу Зандакьлив ккавксса бушиву. «КъакIулли, — увкунни, — вил ласнал буттал, ганал зумув мусил ккарччив ккарккукун, цала арсшиврийгу мукIру хьуну, уччара увкуна».
Ласнал нитти-буттахъанний маоь, кIурукъатта бур, на хIаят­равун бувххукун, циняв бавчунни тту­хьхьунна, оьрчIахьхьун цIуллушиву дулуннав тIий. Ххал хьунни ласнал ниттил цIарцIсса лажин — ца язугъ хьуннихха, арснахри тIий зума тIий, оьттул макь рутIлатIисса ганий. Гъан хьуну учав: увччума Кьурбан акъар, Кьурбан сагъну боевиктурал цащала увцуну ур куну. Бусав ттунма ккавкцири. ЦIубутIуй вих хъанай бакъая. Нагу гьайгу-дайгу, гьав ппив дуван аьркин­ссар, ттула ласнал нурчIи ттунна дурчIинтIиссар тIий бура.
Гьун­ттиймур кьини гъарал дуну, саранумур кьини, бардултгу бувцуну, лавгру гьаттачIан. Гьав ппив дайхту, уккайхтува увчIунни ттула лас акъашиву га. Ттул ласнал мусил ккарччив хьхьичIъя дусса, ганай чулух дия. Ттул лас чурххал лахъсса, загълунсса уссия, га чансса лагь-лагьсса ия. Ттул лас камуфляж формалуву уссия, ганай укунна­сса янна дия. Жущал га ивкIусса оьрчIал щарнил уссугу уссия, гайннал нурчIи ларсуна цала шяравуннай.
Гьунттимур кьини ласнал ниттищал ва мукуна акъа хьусса Исяев Мутайл кулпатращал лавгссару Веденолийн. Веденолий жу цIухлай лякъарду Хаттаблул къатри. Гикку боевиктурал бувчIин бунни Басаевлулми къатри лякъин аьркиншиву, буниялагу Ккурккиев Аьли ва АхIмадов Кьурбан заложникталну бушиву. Лавгру БасаевлучIан, бувчIин барду жулва мурад. «На зущал гъалгъа тIун ччай акъара, зу ттучIан циван бувкIру, зу гьан аьркинссияв РОВД-лул хъунаманачIан», — куну, кьукьин бунни. Яла ца боевикнал: «Ва цIана сситтуй ур, шийхсса сагъсса заложниктал Дагъусттаннай­сса боевиктурал нурчIах баххана бара тIий къабуллай тIий», кунни. Жу гичча бачин сукку шайхту, боевиктуравасса цаманал бувсуна заложниктурал кьадар шариаьтрал судрахь бушиву ва му судралгу хIукму бувшиву, сагъсса заложниктал бивххун, нурчIи нурчIилух даххана дувансса. Жу махъунмай бувкIун, РОВД-лул хъунаманахь бусарду жунма бавмур. Гиха, Чачаннава, бувкIсса инсантура­хьхьун дуллуссия ЦIуссалаккуйсса боевиктурал нурчIив, жу тIурча цIу­нилгу ссапар бахIарду гихун. Ва ххуллухь Шамил Басаевлул къатра­чIан гъан хьунмагу къабивтунну. На, хъювсул бувккун, аьтIун бивкIукун, ца боевик гъан хьуну ттучIан, савав цIув­ххуна. Бувсукун: «Му уссар шикку, амма ви­хьхьун му щил улайссар?» тIий ия. Яла: «Жу му аххана ан ивтун бу­ссару», — куна. ХIисав буллай, Чачаннал кьунияхъайсса шяраваллавух бувккун бура на. Махъва-махъ, ноябрьданий, гихун лавгсса чIумал, на гайннахь увкуссия, циксса арцу аьркинну дуссарив бусийча, юхссагу, мунахлу аххана увансса Дагъусттаннайсса боевикнал цIа-бакI бусийча увкуну. Укун гъалгъа тIун бивкIукун, боевиктурал увкуна ттухь, Хаттаб­лучIан насу, увкуну. Хаттабма ттун шава къалявкъуна, гиккусса боевиктурал увкуна: «АхIмадов Кьурбан шикку икIайссия окопру дуклай, давуртту дуллай, яла увцуну лавгуна шичча», — куну.
Ца-кIива гьантлува ялагу Хаттаб лякъайрив ккаккан лавгру. Хаттаб лявкъунни жун, ганал увкунни: «Гъалгъа тIунгу ччай акъара, чув уссарив, ци ув­ссаривгу къабусанна», куну. Муния мукьахгу гикку боевиктуращал жап тIий бунува (га ца жул дакI хьунмур буслай ия), цама гъан хьуну, щих луглагиссарив цIугу-цIувххуну: «Му бивтун увтссар, муналгу жулми кьатI бувну бивкIун бия, муниятур рахIмугу къабувсса мунай», увкуна. Гама тIурча, ганайнгу гьужум буллай, ттухь: «Мавихшара мунал бусласимунийн», тIий ия.
Боевиктураву бия личIи-личIисса миллатирттал халкь. Ттунма тамаша бизлазисса зат му бияхха, цаягу боевикнал иттав уруглай, сивсуну гъалгъа къабайва, яру щяту гьаз къабуллай гъалгъа тIун бикIайва.
Уттигу гьан ччай буссияв гьакссагу гихун, я цува, я нурчIи къаляркъуну къабикIанна тIий, ва куццуй азарханалийн багьунна. Ттул азарханалийн багьансса чарагу бакъассия, чIивима арснан кIира шин ва дачIир, хъунмур душ тIурча (мунин 9 шинни) мяммал сурат бакIралу дакъа уттукъабишайссар. Цува Кьурбан ттухь икIайссия чIявуну: «Ттунна бу­ттал лажиннарагу къаккаркссарча, ттула оьрчIру ттулла лажин дакIний личIай хьуннин итайссания» — тIий. Душгу бикIай гьар кьини, «Дадай, ивкIухьурча, мяммал, нурчIи лякъи, икъав­кIухьурча цува лякъи, гьаврагу дикIан аьркиннихха гьаттайн занан», — тIий.
Бувгьусса циняв 25 милицанаяту цIана мукьа ливчIун ур: ттул лас Кьурбан, Мурачуев Халид, Алхулаев Ибрагьин, Исяев Мутай. Махъва-махъсса хавар Чачаннава укунсса бувкIунни: наркотик­ру бахлай Хасавюртлив дирирсса щарсса дуккан дан кумаг бара, Кьурбан итаакьиннуча, тIисса. Амма балжину Кьурбан сагъну ушиву исват буллалисса чагъар, сурат, ца цичIар жучIан къадирссар. Мукунма заложникну агьсса ца милицанал кулпатрачIан бувкIун, итаакьиннуча, долларду булара куну бивкIссар, мигу буллуну, бакI-магъ къаляркъунма ливчIссар. Жугу цал Кьурбан сагъну ушивриясса барашинна ккаккан дара тIий буру.
Ттулла зумув рухI дуну, Кьурбаннул бакIрачIан бувкIмур балжину кIул къабувнурив чара ба­къассар. Гьакссагу хIарачатрай занай бивкI­ра. Я нава, я ттущала ласнах луглагисса Аьбидат «зунмагу бала шай­ссарча, мазанарди» тIисса наси­хIатирттах ургъил буллайвагу къа­бивкIру. Чачаннал 21 шяравалу ккуччу дав, ца ххуллухь, лагерьданий бунува, ттупал чявхълухьхьун биривну, боевиктурал, цащалва блиндажирттавун кIункIу бувну, ххассал бувнав.
Яла, махъату, Ккурккиев Аьли итаакьайхту, мунахь укун пулансса кIанттурдайн бивссияв тIий буслай буссиявча, ­Аьлил куна: «КIа пулансса кIанай някIсса будка дакIний бурив, жу кIиву б­уссияв» куну. Къащилул бивчIавай лив­чIунна га хIалатраву – нава ласная шанма шаттирал архну бивкIсса бувчIайхту.
Аьлийннив на дакIнийхтуну барчаллагьрай бура, га ттул ласнащал цачIу зуруй ивкIссар, пIякь кусса гранатометрал цIалцIив дук­лай, ттул ласнал къювурду лагь данмур буллай ивкIун ия. Тти зува хIисав бара, «Щарссанин аьпалун дикIувча» тIий, Кьурбаннул Аьли­хьхьун тIайла дурксса ккурттулий дия 32 ккуллалул ккутI. ВичIилухух чIюхлайнма бур ттула ласнал Ккурккиев Аьлия­ту личIи хъанахъийни бувсса аманат. Кьурбаннул ганахь увкуну бия: «Ттул нурчIи цукунчIав кьамаритари, на ятIа-тIар бакъа акъа хьуминнал сияхIравун агьан маитари». Мунал аманат биттур къабувссаксса, ттун рахIатсса мутта бакъассар.
Утти Гудермеслив тIивтIуну бусса бур 6-мур Управление, нава ччаннай бацIайхту, тайннал ци кумаг байрив ккаккан тихун гьан дакIний бура.

***
Ци ххи банну ванил «кьур­чIисса кьиссалул» ялун? ЧIявусса кулпатирттан, тухумирттан бувар ттигу къуртал хьун ЦIуссалаккуйсса дяъви. БакIран къаккавк къаливчIсса Миясатлун циняв аьзав-аькьуварду хъамаритансса ххаришивуртту ялун дияннав, Аллагьнал хъинмур чивчуну лякъиннав тIий буру.
ПатIимат Рамазанова
Тамара Шарипова
№14 «Илчи», 2000 ш.