Июнь зурул 17-нний Цалчинмур ЦIувкIрав, ссурхIиял дазуцIсса Цумурщин тIисса кIанттай, хьунни дусшиврул байран хIисаврайсса, чIявусса агьалигу бавтIсса мероприятие. ХъунмурчIин — дучри ххяххан баву. Ва даврил сиптачину ия ссурхIиричу Муса Узунаев. Ва дия ванал цала буттал, цIакь бусса спортсмен МахIаммад Узунаевлул аьпалун дуллалисса даву.
Ччалли ххяххан бан майданнив буккан бувну бия 50-60 балчан. ХьхьичIун бувкминнансса премиярдал фондгу 400 азарда къуруш дия.
Мероприятие дачин дурну ия Дагъусттаннал культуралул лайкь хьусса зузала, Дагъусттаннал Чичултрал союзрал лакрал литературалул секциялул хъунама Супиян Оьмаров. Ванал ихтилатраву кIицI лавгуна, ЦIувкIуллал жяматрал мудангу хIала-гьурттушиврийсса арарду диркIшиву ссурхIиял агьулданущал, циняв байранну, хъинну хIадургу хьуну, цачIу лавайсса даражалий дувайсса диркIшиву хьхьичIрагу.
– Жува ва Цумурщинай бавтIун буру, дакIнин бичин жулва ппухълу, дакIнин дичин жулла оьрчIшиврул, жагьилшиврул шинну, ябитан лагма-ялттусса дакIнил ларсъсса тIабиаьтрах, лухччах, зунттурдах, вичIи дишин Цумурщинал жюр-жюржулул чIуних, тамаша буван дучри ххяххан буллалисса оьрчIай ва жагьилтурай, цIакь дуван дусшиврул арарду, – увкуна ванал.
ЦIувкIуллал шяраваллил администрациялул хъунама МахIаммадрасул Илдаровлул барчаллагь увкуна байран даврил сиптачинахь, МахIачкъалалия, Дарбантлия, цайми кIанттурдая бувкIсса инсантурахь. Махъру лавхъуна ЦIувкIуллал шяраваллил учитель Мажид Баговлул, жяматийсса ишккакку, предприниматель Башир СантIуевлул, Ккуллал колхозрал председатель Чупалав Кьурбановлул, Шяраваллил хозяйствалул министерствалул вакил Юсуп ХIасановлул, Ставрополлая увкIсса МахIаммадрасул Оьмаровлул.
Мероприятие лавайсса даражалий дуван хIарачат бувсса Муса Узунаевлулгу, ссурхIиял диаспоралул вакилтуралгу кIицI лавгуна, дучри ххяххан баврил мероприятие гьар шинах аьдатравун дутарча, хъинну хьунссия тIисса пикри.
– СсурхIиял хъинну ххуйну хIадур бувсса балчант бия, бахшишругу миннал ларсуна хъунмурчIин. Ттулла ца ххаришиву ялагу ссая дия учирча, лакрал вакилтурацIун ссурхIиялминналгу махъру лавхъуна хъунмурчIин лакку мазрай. Трактор дучIан дурну, ссурхIиял цала бакьин бувну бия ЦIувкIрату Хъунфермалийнсса ххуллугу, машинартту паракьатну гьаз шайсса даражалийн бувцуну бия. Вагу жула жяматрансса къулайшиннар. КIивайвагу жяматру гьурттуну ххуйсса хъамалушинна дансса ссупрагу бия. Буниялттунгу, хъуннасса байран дия, цинявппа рязину бия», – тIий ур Супиян Оьмаров.
Ванал увкумуницIун навагу ххи банна: ттул оьрчIшиву ва жагьилсса шинну ЦIувкIрав ларгсса духьувкун, гьай-гьай, на танивагу ссурхIиял шяраваллавун ва мащайн бияйсса бивкIссара. Ттунмагу тамаша бизайва чIявусса ссурхIиян лакку маз кIулшиву. Ттул ппу удаман ия, ЦIувкIуллал колхозраву тамансса хIухчалт ссурхIи бикIайва, ми жуннийн бувххунма, бувккунма бикIайссия. Супияннуяр ххишалану ххари хьура навагу, ссурхIи уттигу лакку мазрай гъалгъа тIий бушиврия, жунма, жулва оьрчIан хъамабитлатисса лакку маз ссурхIиял зумув ишлану бушиврия. Ссал къабагьари укунсса иширая ххари хьунмагу дучри ххяххан баврил байран!
Дусшиврул байранну – совет заманнул ца яла ххуймур дарсри, аьдатри. Журагу ядан аьркинсса. Ядуванхьуви, ядуван хъит тIисса арсру буссаксса.
ПатIимат Рамазанова
