«Миллат цашиврул яла хъунмур хIикмат – маз ца бушивур. Жунма маз ябан ччарча, хъунмур даву дикIан аьркинссар оьрчIащал дархIусса, мазрая бакъача, му мазрай гъалгъа тIутIи буллалисса».
Роза Эльдарова
Июнь зурул 20-нний МахIачкъалалив , Поэзиялул театрдануву, хьунни «Илчи» кказитрал Ххувшаврил байрандалун хасну баян бувсса оьрчIал назмурду дуккаврил конкурсраву ххув хьуми, хьхьичIунсса гьурттушинна дурми барча буллалисса шадлугъ.
Ва дачин дурнугу ия Дагъусттаннал культуралул лайкь хьусса зузала, Дагъусттаннал Чичултрал союзрал лакрал литературалул секциялул каялувчи Супиян Оьмаров. Хъиндайдихьу дуллалисса махъ лахълай, «Илчи» кказитрал хъунама редактор Руслан Къардашовлул барчаллагь увкуна ва конкурсрал чIарав бавцIуцириннахьгу, гьуртту хьуцириннахьгу , оьрчIру хIадур бувсса нитти-буттахь ва учительтурахь.
ОьрчIру барча буван ва кьини сахIналийн бувккуна, «Илчилул» коллективрал зузалт бакъагу, мудангу кказитралгу, миллатралгу дуллалисса давурттавух чялишну гьуртту шайсса жяматийсса ишккаккулт, халкьуннал чичулт, аьлимтал, шяраваллал администрациярдал бакIчитал. Гьаннайсса, бусравсса инсантал.
Шадлугъ хъун дурна балайчитурал, Дагъусттаннал халкьуннал артист ХIажиаьли ХIажиаьлиевлул, Дагъусттаннал лайкь хьусса артистка Загьидат Муслимовал, балайчи, музыкант Руслан Оьмариевлул ва тележурналистка, «Аьрщи ва агьлу» лакку мазрайсса телепередача дачин дувайсса Карина Далиевал.
Мариян Илиясовал цIанийсса «Дараччи» клубрал хъунмур Гульшан Хасаевал увкусса куццуй, ва дия лакку махъ гьаз буллалисса, лакку мазрал бучIантIимуний дакIцIуцIаву думи хIала бувххун, ккуркки лавгун дурсса хIакьсса лакку мукъул байран.
Балжину ва шадлугърая бусанну хъиривмур номерданий.
ПатIимат Рамазанова