Февраль зурул 21-нний ЦIуминалийсса ЦIуссаккуллал шяравусса «Ца кIанай къаацIу» («Непоседа») тIисса садикрай Ниттил мазрал байран хIисаврайсса мероприятие дунни, оьрчIал ниттихъул, мачча-гъанми, шяраваллил активистътал бавтIун.
Республикалул кказитрай ва мероприятиялия бусаврил мурадгу мури, ва садикрал ккаккан бувнутIий ниттил мазран хас дурсса мероприятияртту цукун дуван аьркинссарив.
Байран цурда дайдирхьуна лакрал гимн учаврия. Зал цуппагу лакку ужагъ кунма чIюлу бувну бия. Миллатрал лаххиялуву бия садикрал зузалт цинявппа. ОьрчIру цивппагу мукуннасса лаххиялуву назмурду, саннарду ккалай бия. Ккаккан бувна мюрщисса сценкардугу: Малла НасруттиннуцIун бавхIусса ва машгьурсса Азана ва Ккузанаясса. Гьаннайсса, чIава артистътурал лакку театр. Тарбиячитуращал архIал оьрчIал ккаккан дурна бархъаллал тIахIунтту дуваврил аьдатгу. Вагу жулва тарих, канил пагьму. Бузмардавусса душваврал ца ххуйну ккаккиялун дирхьуна лакку дукрарду. Вагу оьрчIан лакку дукрарду лахьхьин дуллалисса дарс хIисаврайсса даву.
Байрандалул гур дурна хъамаллуралгу. ЦIуссалакрал райондалул культуралул зузала Аьйша Жабраиловал ччергъилттухун балайрду увкуна. ЦIуссаккулув яхъанахъисса Уммужигьан Рамазановал цилла ляхъан дурсса назмурду дурккуна. Ва даву ххуйсса даражалий гьан биялсса захIмат бивхьуминнахь барчаллагь тIий, садикрал хъунмур Фарида Базановал кIицI лавгуна, цукунчIав ниттил мазгу, ппухълуннал аьдатругу, культурагу хъамаритан къабучIишиву, ва ишираву хъунмур бияла кулпатрахь бухьурчагу, садикрал зузалтралгу хIарачат буллантIишиву цачIанма заназисса оьрчIан лакку мазгу лахьхьин буван, лакку культуралул кьиматгу кIулну тарбия буллан. Ванил увкумуницIун ххи буванна, агар укун садикирттайва оьрчIан лакку маз итххяххан кабакьу булларча, жулва культуралия хавар буну тарбия булларча, миллат хIисаврай бюхъай жулва ишгу цахъис бунугу къулай хьун.
ПатIимат Рамазанова
