Дагъусттаннал Росгвардиялул Вневедомственный къаралданул управлениялий хьунни подразделениялул хъунаманал хъиривчу, полициялул полковник Навруз ХIусайновлущалсса пресс-конференция.
Ванал бувсунни цала къуллугърал бигардая ва дунни 2024-ку шинал лажиндарай подразделениялул дурсса даврил хIасиллу.
Вневедомственный къаралданул зузалтрал буручлачиссар национал гвардиялул аьралуннал ябан ккаккан бувсса хъуннасса агьамшиву дусса объектру, дузал дайссар хъунисса къуллугъчитурал мюхчаншиву, мукунма гьуртту шайссар чIявусса халкь бавтIсса мероприятиярттай жяматийсса низам ва агьалинал мюхчаншиву сахла даву мурадрай.
Навруз ХIусайновлул бусласимунийн бувну, хIакьинусса кьини подразделениялул зузалтрал буручлай бур 4 азарва объект ва инсантурал квартирарду, 67 автотранспорт.
Республикалий гьарица кьини жяматийсса низам дуруччин патрульданий буклай бур 14 экипаж. Нанисса шинал вайннал увгьуну ур административ тIулдакъашивуртту дурсса 541 инсан. Цавагу къавхьуну бур вайннал ябуллалисса объектирдава цурк бувсса ишру. Вара чIумул дянив щалагу республикалий вневедомственный къаралданул зузалт гьуртту хьуну бур чIявусса инсантал бавтIсса 38 мероприятиялий.
Му бакъассагу, ведомстварттал дянивсса комиссиярттаву подразделениялул зузалтрал ххалбигьавуртту дурну дур, кIулшивуртту дулаврил идарартту терактирдаща мюхчанну бурив кIул баву мурадрай.
Полковникнал кIицI лавгунни региондалул кIулшивуртту дулаврил 2570 идаралува1245 техникалул кумаграйну буручлай бушиву.
Подразделениялул зузалт мукунма гьуртту хьуну бур чIявусса инсантал бусса объектру ххал бигьавриву ва миннун категория дулавриву. Ялун лирчусса диялдакъашивурттайн бувну сакин бувну бур 14 протокол.
ХIасил, зузалтрал бартбивгьуну бур цала хьхьичI бивхьусса циняв бигарду.
Журналистътурал суаллахьхьун жавабру дуллай, хIаписарнал бувсунни цала къуллугърал дуллалисса цIусса хIаллихшиннардая, бувсунни квартирардай, къатраву сигнализация дишаву ссан дацIлацIиссарив. Подразделениялул зузалтрал мукунна дуручлай бур республикалий ва республикалул кьатIув ца кIаная ца кIанайн ларсун нанисса кьай, багьлул ххирасса затру.
Ихтилат къуртал буллай, Навруз Х1усайновлул бувсунни подразделениялул зузалтрая ва миннал къайгъурдая.
ДакIнин увтунни чувшиврий жан дуллусса вневедомственный къаралданул Каспийскаллал отделданул зузала, полициялул лейтенант МахIаммад НурбахIандов. Мукунма дакIнин бивчунни цала зузалт жандалия ка ларсун террористътурайн данди бавцIусса июньдалий хьусса ишру. Арула зузалан дуллуну дур паччахIлугърал наградартту.
Андриана Аьбдуллаева
