![](https://ilchi.info/wp-content/uploads/2022/04/8907e038-1fd7-40da-83e1-e57.jpg)
«Илчилул» ванияр ца-кIива номерданул хьхьичI дуссия Орел шагьрулий хьусса спортрал бяст-ччалливу гьуртту хьусса жулва спортсментураясса макьала. Вайннавух кIицI лавгун буссия ГьунчIукьатIрал шяравасса ссурахъал ХIабибуллагь ва Шахмир Чарттаевхъулгу. Кказит бувккун махъ жучIан оьвкуна, цала шяравасса жагьилтурая гьарта-гьарзану кIул хьуну ччива тIий. Ххарину ва гъирарай чичлай буру шяраваллилгу, миллатралгу пахруну хъанахъисса жагьилтурая, Чарттаевхъал тухумрал хьхьичIунсса вакилтурая.
ХIабибуллагь ур кIира даву, кIива пиша – усттарну бачин буван бюхъайми инсантуравасса ца.
Шахмир цимилгу ххув хьуну ур Дагъусттан Республикалул ва Аьрасатнал карунний бияврил бяст-ччаллай.
Гихунмайгу вай жагьилтурая бусаннин, махъунмай тарихравун зана хьуну, ца-кIива махъ учин ччай бур вайннал ттаттахъаягу.
ХIабибуллагьлул ва Шахмирдул ттатта Султанмурад Чарттаев, Чирюртуллал ГЭС-рай зузисса жагьил, 1950-ку шинал тIайла увккун ивкIун ур Таджикнавун, гидроэлектростанция буллан. Ачин хьхьичI ташулул хьуну, цащалва тихун бувцуну бур кулпат Кавсарат Чимаевагу. Таджикнаву дунияллийн бувккун бур вайннал 2 арс ва 2 душ. Шинну ларгун махъ хъуна-хъунама арснал ТIалхIатлул, зана хьуну тарихийсса ватандалийн, бувцуну бур цала шяравасса ХIажиев Камиллул чIивимур душ Зарема. Вайннал дянив увнугу ур хIакьину жува ихтилат бачин бувсса ХIабибуллагь. Султанмурадлул ва Кавсаратлул чIивимур душнил, Мариянал, кулпатраву ур Шахмиргу.
Таджикнаву мина-гьанулул хьусса Султанмурадлул, пенсиялийн увккун махъ, тIивтIуну бур цалва дуссукъатта (жестяной цех). 1990-ку шинал Таджикнаву сукку хьуну бур дяъви, Чарттаевхъал къатлувунгу бувкIун бур бала – ятIа-тIар бакъа акъа хьуну ур Султанмурад. Цуксса лугларчангу, цичIав кIул бувангу бювхъуну бакъар. Кулпатран, дяъвилул цIарава ливхъун, Дагъусттаннайн зана хьун багьну бур. Кавсарат аьпалул хьуну бур 2007-ку шинал.
ХIабибуллагьлул вама ттатта, ХIажиев Камил, цала оьрмулул 25 шинаву, 1953-ку шинал, шяраваллил колхозрал председательну зий ивкIун ур. Жагьилнал каялувшиндаралу колхоз цимилгу лайкь хьуну дур грамотарттан ва барчаллагьирттан. Райондалул бакI дургьуминнал итталун агьну ур жаваблувшиву ларайсса, цалла даву дакI марцIну дуллалисса каялувчи. Камил ивтун ур Лакрал райондалул Шяраваллил хозяйствалул управлениялул начальникну. Ванал кулпат Сабират зий бивкIун бур ГьунчIукьатIрал шяраваллил советрай бухгалтерну. Камиллул ва Сабиратлул дянив хьуну бур 2 душ ва 3 арс (чIивимур душ Зарема – ХIабибуллагьлул нину). Цала душнил оьрчI ХIабибуллагь дунияллийн уккан ца-кIива зурул хьхьичI, хъин дуван къашайсса азар сававну, аьпалул хьуну ур Камил.
![](https://ilchi.info/wp-content/uploads/2022/04/85659bfa-3a2c-4267-8849-3fa.jpg)
Зураб Аьлиевлущал
Укунсса ттаттахъая бивзсса жагьилтал бур ХIабибуллагь ва Шахмир.
ХIабибуллагь Чарттаев увну ур 1986-ку шинал Таджикнаву, Колхозабад поселокрай. ОьрчIал 1-мур класс къуртал бувайхту, вайннал кулпат ватандалийн зана хьуну бур. ХIабибуллагь занан ивкIун ур МахIачкъала шагьрулул 30-мур школалийн. Ххуйсса кьиматирттайну вагу къуртал бувну, 2003-ку шинал увххун ур Дагъусттаннал паччахIлугърал технический университетравун, цала ттаттал, Султанмурадлул, шаттирдайх авчуну – энергетик хьунсса пикрилий. 2008-ку шинал, дуккаву къуртал дурну махъ, ХIабибуллагь зун ивкIун ур «Федеральная сетевая компания Единой энергетической сети» – Каспийское предприятие магистральных электрических сетей» ПАО-лий. Зузаврищал архIала увххун ур ДГТУ-лул магистратуралувунгу. Инженерну зий айивхьуну, производственный активирттал управлениялул начальникнал къуллугърайн бияннинсса ххуллугу бивтун, ХIабибуллагь хIакьинугу зий ур вава даврий.
«Аьрасатнал лидертал», «Ттул Дагъусттан», «Энергетикалул лидертал» ва цаймигу дур чинсса конкурсирттай гьуртту хьуну, финаллавун ивну ур ХIабибуллагь. Ва мудангу зий ур цалла кIулшивуртту куртI ва авадан даврил ялув. ЦIанагу ХIабибуллагь дуклай ур ДГУ-луву магистратуралуву, «управление и экономика труда» факультетрай. Ва хьунтIиссар жагьилнал ларайсса дуккаврил шамилчинсса диплом.
Республикалул федерациялул судейский коллегиялувугу лайкьсса кIану бугьлагьисса ХIабибуллагь, цалчинмур категориялул судьянал цIагу тасттикь дурну, 2020-ку шинал увххун ур щалагу Аьрасатнал федерациялул судиятурал составравун.
Ванал бур нахIусса бавкьусса кулпат. Ялув ЧIатлухъиял шяравасса Мадина язи бувгьуну, 2016-ку шинал бувну бур ташу. Вайннал дянив хьуну бур кIива душ – Мариям ва Мияса. Душру баннин Мадина зий бивкIун бур рестораннал, кафердал дизайн дувайсса пишакарну.
Шахмир Чарттаев увну ур МахIачкъалалив 2004-ку шинал. Шагьрулул 5-мур школалий 9 классгу бувккуну, вагу лавгун ур цала ттаттал ва хъунама уссин ккаллисса ссурахъу ХIабибуллагьлул шаттирдайх – увххун ур Каспийск шагьрулийсса Энергетический колледжравун, цIанасса чIумал шиву дуклайгу ур.
Шахмирдун 10 шин дусса чIумал ХIабибуллагьлул ва увцуну ур тренер Зураб АьлиевлучIан, каруннай бияврил секциялувун. ЦIанакул Шахмир хъанай ур каруннай бияврил Дагъусттаннал чIава жагьилтурал цачIундур командалул член. Февральданий Орел шагьрулий хьусса, билаятрал личIи-личIисса шагьрурдаясса хьхьичIунсса спортсментал гьурттусса Аьрасатнал первенствалий Шахмир хьуссар язисса ххюя спортсменнавух сияхIравун, хасъсса норматив щаллу дурну, хьуссар спортрал мастернайнсса кандидат. Бахшиш дулуншиврул Шахмирдуйн ва ванал тренер Зураб Аьлиевлуйн оьвкуссар ДР-лул спортрал министр Сажид СажидовлучIан. Хьунабакьаврийсса ихтилатраву министрнал чIурчIав дурну дур вай жагьилтурал билаятрал спорт хьхьичIуннай давриву буллалисса хъунмасса захIматрай.
Ваниннингу Шахмир цимилгу ххув хьуссар республикалул ва билаятрал лагрулийсса бяст-ччаллай, первенствардай.
ХIабибуллагьлун ва Шахмирдун ччан бивкIунни цаятурасса ва макьала цала амудадахъан – ХIажиева Сабиратлун ва, аьпа биву, Чарттаева Кавсаратлун, хас дуван, цивппа ччяни ласурваврацIа хьунугу, вайнналмур кIанугу бувгьуну, цалва оьрчIан, оьрчIал оьрчIан тарбия, ччаву дулун бювхъусса.
Вания тийнмайгу чIа тIий буру зун, ХIабибуллагь ва Шахмир, гьарцагу дуллалисса давриву, ласласисса шаттираву тIайлабацIуртту!