Март зурул 29-нний «Аьрасат – ттул тарихри» тIисса музейраву Дагъусттаннал ХIукуматрал председательнал хъиривчу Мурад Казиевлул каялувшиндарай хьунни ДР-лул ЗахIматрал ва социал лябуккулул министерствалул коллегиялул заседание.
Коллегиялул даву дайдихьлай, Мурад Казиевлул кIицI лавгуна, политикалул ва экономикалул захIматсса тагьар хIасул хьусса чIумал, министерствалул идарарттал агьали социал кумагирттал дузал бан хIарачат буллан аьркиншиву.
Даврил хIасиллая бусласисса видеофильм ххал дурну махъ, Дагъусттаннал захIматрал ва социал лябуккулул министр АьвдурахIман МахIмудовлул балжисса ихтилат бувн 2021-ку шиналсса даврил хIасиллал хIакъираву.
Дагъусттаннал агьали давурттал дузал байсса паччахIлугърал идарттайн ларгсса шинал увкIсса 182,4 азара инсаннава 100,1 азара инсаннал аьрзри бур давурттал хIакъиравусса. Ведомствалул органнал хIарачатрайн бувну 51, 6 азара инсан давурттал дузал увну ур. Миннава 9,1 азара инсан ур муданнасса даврийн кьамул увсса, 42,5 азара инсан — чIумуйнусса, жяматийсса давурттавух хIала уххан увну ур 13,3 азара инсан, даву лякъин къахъанай ливчIсса 1,7 азара инсан чIумуйнусса давурттайн кьамул увну ур.
Му бакъассагу, 2021-ку шинал, министерствалул сипталийн бувну, цалчин байбивхьуссар профилактикалул сияхIрайн лавсъсса балугъравун къабивсса оьрчIру ва, танмихIгу лавхъун, дуснакьрава мурахас хьусса инсантал давурттайн кьамул бувсса ишбажаранчитуран хIукуматрал чулухасса ка-кумаг буллай.
Ларгсса шинал хьхьичI ххуттай давурттал дузал увсса 926 инсаннава 100 ур мушакъатшиву дусса, 252 ур чIявусса оьрчIру бусса, мушакъатшиву дусса оьрчIру тарбия буллалисса нину-ппу, 33 инсан ур пенсиялийн уккан чIун гъан хьусса ва м.ц.
Дагъусттаннал ЗахIматрал министерствалул агьали давурттал дузал буллалисса центрдай буллай буссар вакансиярттал ярмукIартту. Миннул кумаграйну давурттал дузал увссар 3,8 инсан.
Му бакъассагу, «Содействие занятости» тIисса федерал проектрал лагрулий ларгсса шинал республикалий 1600 инсаннан хасъсса пишарду лахьхьин бувну бур. Пишарду лахьхьин бувминнава 1360 инсан давурттал дузал увну ур.
Ведомствалул дурсса даврил хIасиллу дуллай, АьвдурахIман МахIмудовлул кIицI лавгунни министерствалул системалуву коррупциялуцIун бавхIусса ишругу хьушиву.
Коллегиялул давриву гьурттушинна дунни ДР-лул Халкьуннал Мажлисрал ЦIуллушиву дуруччаврил комитетрал председатель Илияс Маммаевлул, МСЭ ГБ-лул каялувчи Шамил Рамазановлул ва м.ц.
