Вай ларгсса бигьалагай кьинирдай Лаккуйн ГьунчIукьатIрал шяравун нанисса машинарттал ва инсантурал ккал цайми кьинирдайнияр чIаланну ххисса дия. Шяраву буллай бия Къурнил хъатIи. Буттал буттахъая шихуннайра нанисса Цалчинсса хъарас щаврил аьдат ва интту щаллу дуллай бия Минкаил ва Бадрижат Кьурбановхъал ххаллилсса кулпат.
Вайннал чIарав бацIан билаятрал личIи-личIисса кIанттурдая, лагма щархъая бувкIун бия чIявусса инсантал, яла-яларив – вайннал гъан-маччанал мина дирхьусса Пятигорск, Кисловодск шагьрурдая.
Дурну дия личIи-личIисса дукрарду, щарнил хъами-душру лагма лавгун бувайсса цIа дурксса ккунукрал ххункIру – интнил ва буллугъшиврул лишан. Хьамарай дизлай дия дукьрахIан.
ЦIакь хьусса аьдатрайн бувну, къурув буккан хьхьичI цал щябивкIуна Хъун хъузалал къушлий: ххал бувну дурччу шинну кунмасса ккунукрал ххункIругу, хIарчIун дукьрахIангу, бувккуна хъув. Щуна хъарас, хьуна личIи-личIисса спортрал бяст-ччаллу, дучри ххяххан баву. ХьхьичIун бувкминнан дуллуна Къурнил хъатIул залуннал чулухасса бахшишру.
Кьурбановхъал хIаятраву къур бувна мажлис. Му тIивтIуна Минкаиллул ссурахъу Пастамин Сагидовлул. Гихунмайсса мажлис тямадашиврий бачин бувну ия Зиябуттин ХIажимирзаев.
Мажлисрайсса музыкалулсса, тяхъашиврулсса буллай бия ГьунчIукьатIрал шяраваллил культуралул къатлул ва райондалул культуралул зузалт. Мажлис лахъи лавгуна хьхьудяризаннин. Ва цуппагу хьуна лавайсса даражалий.
Ца-кIива махъ Кьурбановхъал кулпатрая. Ва хъанахъиссар шяравугу, райондалийгу ца яла хьхьичIунми ва эбратранми кулпатирттавасса цану. Фронтовик Якьув Кьурбановлул арснал Минкаиллул 30 шинни Лакрал ва Ккуллал районнал РЭС-рал (районнал электросети) хъунама инженерну зий. Бадрижатлул 20 шинни ГьунчIукьатIрал дянивмур даражалул школалий учительну зий, ва ветеран Жамалуттин Ибрагьимовлул душнил душри.
Минкаиллул ва Бадрижатлул цимигу шинъя Кьуру ласун ччай, ва багьана, та савав хъанай ливчIун.
– ДукIу, ахиргу, лавсъссия Кьуру, хъунмасса гъирарай хIадур хъанай буссияв ва байрандалийн. Яла буруккингу бия гьавалул тагьар цукунсса хьунавав тIисса. Гьавагу бавкьусса бия, жяматгу лагма лавгунни, гьарцаннал ххуйсса кумаг бунни, барчаллагь цинявннанмагу. Даркьусса ххуйсса шин хьуннав. Дунияллийн паракьатшиву ликканнав, – тIий ур Минкаил.
Хъиривмур шиналсса Кьуру лавсунни АхIмад Исубуттаевлул.
Бадрижамал Аьлиева
