Вай гьантрай Гъумук лавайсса даражалий хьунни райондалул Магьирлугърал къатлул зузалтрал нанисса шинал дурсса даврил хIасиллу дуллалисса концерт. 

Ва ххал дан бувкIун бия Лакрал райондалул бакIчи Зураб Куччаев, ванал хъиривчу Малик ХIусманов, райондалул Депутатътурал Мажлисрал председатель Явсупа ХIамзаев. Бусравсса хъамаллуравух бия артистътуран бахшиширттащал бувкIсса М.Илиясовал цIанийсса «Дараччи» ихIсандалул фондрал президент Гульшан Хасаева, чIярусса шиннардий райондалул бакIчишиву дурсса Юсуп ХIамидовичлул кулпат ПатIимат МахIаммадова (Хачилаева), хореограф, Дагъусттаннал лайкь хьусса искусствалул ишккакку Тарият Къапиева.
Мажлис бачин бувну бия Дагъусттаннал культуралул лайкь хьусса зузала АьлихIажи Шамххалов ва Шамсият Какваева. Концертрал программа дайдишин хьхьичIсса ихтилатраву вайннал кIицI лавгунни миллат миллатну яхьун культуралул бияла хъунмасса бушиву, инсаннал оьрмулуву магьирлугърал ца агьамсса кIану бугьлай бушиву, бувсунни Лакрал райондалий магьирлугърал даву мудангу лавайсса даражалий диркIшиву, цIанасса чIумал райондалул культуралул идарарттал даража гьаз бан, ми личIи-личIисса федерал программардавух хIала духхан дан хъунмасса кумаг буллай бушиву Дагъусттаннал культуралул министр Зарема Буттаева. Дагъусттаннай культура лядуккан даву мурадрайсса федерал программалийн бувну, хьхьичIсса шиннардий бакьин бувну бур ГьунчIукьатIрал Культуралул ва дялахърулул центр, цIана Ккурккуллал шяраву бувну къуртал шавай бур цIусса клуб. Мура программалийн бувну шяраваллавусса клубирттан итадаркьуну дур музыкалул инструментру ласунсса арцу.
Культуралул даврил хIасиллу дуллалисса концертрал авадансса программалул лагрулий зузалтрал ккаккан дунни хъатIул, жалин дуцаврил аьдат, усттарну бивхьунни Аьбдулмажид Исмяиловлул «Ряха нарт», АьлихIажи Шамххаловлул «Акъа хьусса арс» тIисса инсценировкартту, Нажвадин Халиловлул «Вайлдберриз» тIисса интермедия, ккаккан дунни фольклорданул къавтIавуртту. Ххаллилсса балайрду увкунни «Вирттал» группалул каялувчи, «Душа Дагестана» премиялул лауреат, Дагъусттан Республикалул ХIурматрал грамоталун лайкь хьусса АьлихIажи Шамххаловлул, вава группалул солист, махъругу, макьаннугу цала чичайсса Нажвадин Халиловлул, «Вайлар» группалул каялувчи Гулизар Сайпуллаевал, Шавлукь МахIаммадовал, Халисат ХIасановал, Жамиля АхIмадовал, «Вайлар» группалул солистка, «Душа Дагестана» премиялул лауреат, Дагъусттан Республикалул ХIурматрал грамоталун лайкь хьусса зузала Мариян Жамалуттиновал ва ванил ссийл Алиса Жамалуттиновал, С.ХIабиевлул цIанийсса Халкьуннал театрданул режиссер, Дагъусттан Республикалул ХIурматрал грамоталун лайкь хьусса Шамсият Какваевал. Концертрал программалуву гьурттушинна дунни дуклаки душ Наргиз Ибрагьимовалгу.
КIицI лаган, хIакьинусса кьини райондалийсса Культуралул центрданул даву лавайсса даражалий дуллай, зий дур тамашачитуран нукIура ххира хьусса ххюра ансамбль: фольклорданул ва хореографиялул ансамбль «Гъази-Гъумучи», хъаннил вокалданул группа «Вайлар», арамтурал вокалданул группа «Вирттал», халкьуннал инструментирттал ансамбль «Лакия» ва Саид ХIабиевлул цIанийсса халкьуннал театр.
Мукунма Культуралул центр­данучIа зий бур щархъиял культуралул зузалтрая сакин хьусса «ХъункIултIутIив» тIисса группа.