2016-ку шиная шиннай октябрьданул 21-нний жура кIицI лагару Дагъусттаннал культуралул кьини. Миллатирттал ва культурардал аваданшиврийну Аьрасатнал карталий ляличIиссава кIану бугьлагьи­сса Дагъусттаннан ва хъанай дур дакъа чара бакъасса байранну. Лаккуй, муданна кунна, кIицI ларгунни ва кьини.

Гъумук Культуралул центрданий тIивтIуну бия миллатрал майдан. Ваний ккаккиялун дирхьуну дия халкьуннал багьу-бизу, аьдатру ккаккан дуллалисса хьхьичIарасса тIахIни-кIичIу, матахI, щаллу дурну дия луттирдал «Культура ва маз сагъссакссари халкьгу уттавасса» тIисса выставка.

Байрандалий гьуртту хьунни райондалул администрациялул ва райондалул кказитрал вакилтал, Гъумучиял школалул педагогтал ва дуклаки оьрчIру, Гъумучиял оьрчIал искусствардал школалул тарбиялувтал, райондалул щархъал библиотекарттал зузалт.
Мажлис бачин бувну бия Шамсият Какваева. Ниттил мазрал, халкьуннал культура дуруччаврил агьамшиврийн багьай­сса ихтилатру бунни Культуралул центрданул директор Малик Кьурбановлул, «Ххяххабаргъ» кказитрал редактор Аьбдулмажид Исмяиловлул, лакку мазрал учитель Роза Бавасулаймановал ва м.ц.

Буллалисса ихтилатирттал лях-карах лакку мазрайсса балайрду увкунни райондалул Культуралул центрданул зузалт Нажвадин Халиловлул, Гулизар Сайпуллаевал, АьлихIажи Щамхаловлул, Кьубиял шяраваллил библиотекарь Мункират Исуповал.
Дагъусттаннал шаэртурал ниттил мазраха, ватандалуха чирчусса назмурду дурккунни Гъумучиял искусствардал школалийн заназисса Жамиля АхIмадовал, ХIалимат Оьмариевал, Заза Апанниевал, Наргиз Ибрагьимовал, Амина Аьша­евал, Амина ЧIаматIовал, Ххюлусматусса Зугьра Буттаевал, Кьубатусса Замира Исуповал, ЧIаратусса ОьмархIажи ХIажиевлул, ГьунчIукьатIатусса Сабир Юсуповлул, КIундиясса Лианна Уракмурзаевал, Щаратусса Сиражуттин Аьлиевлул, Инишатусса Расул АхIмадхановлул.

Дагъусттаннал культуралул кьинилун хас дурсса шадлугъ хIадур дурну дия Лакрал райондалул ЦБС-рал директор Мариян Аьшаевал. Шадлугърал сценарий щаллу бувну бия Лакрал райондалул Культуралул центрданул методист Рукьижат МахIаммадовал.