МахIачкъалалив, Р. ХIамзатовлул цIанийсса Национал библиотекалул конференц-залдануву, хьунни Дагъусттан Республикалул Культуралул ирс буруччаврил агентствалул ларгсса шинал дуван бювхъумунил хIасиллан ва ва шинал дуван дакIниймунил планнан хас бувсса коллегия.
БатIаву дайдихьлай буллалисса ихтилатраву Агентствалул каялувчи МахIач Мусаевлул барчаллагь увкуна республикалул каялувшиндарахь, общественниктурахь, муниципалитетирттахь Дагъусттаннал культуралул ирс буруччаврил масъаларттах дуллалисса къулагъасрахлу.
Ларгсса шинал дуван бювхъуми давурттая буслай, кIицI лавгуна цалва пишакартурал, федерал агьамшиву дусса объектирдайн лавгун, дуршиву пландалувун ларсъсса 26 ххал баву, ялув бацIаву, вай аьрххирдал хIасиллайн бувну ялун личин дуван бювхъусса диялдакъашивуртту духлаган дувансса гихунмайсса шаттирдугу лавсшиву. Мукунма бувсуна федерал ва региондалул агьамшиву дусса культуралул объектру буруччавриву ларгсса шинал щаллу дуван хьумуния ва вава мурадрай гьашину дуванмуния. Каялувчинал ва кьинисса ихтилат так хьхьичIуннайшивурттаясса бакъая, мукунма бувсуна цалла давриву хьунадакьлакьисса захIматшивурттаягу, диялдакъашивурттаягу.
Коллегиялий ялагу докладру бувна Агентствалул каялувчинал хъиривчу Таиса Аьлибуттаевал, «РЦОПИК» ГБУ-лул директор Руслан ХIажиевлул ва м.ц.
Докладирттая махъ археологтал Мурад Сайпуттиновлун ва Юсуп МахIаммадовлун барчаллагьру баян бувна, археологиялул гьайкаллал хъирив лаявурттаву бувсса захIматрахлу.
БатIаврил ахир дуллай, МахIач Мусаевлул бувсуна ва шинал цу-цуми ххуллурду бувгьуну бачинтIиссарив цивппа.
