Чувшиву. Ватан ххирашиву. Цир яла дикIан багьлагьисса жула жагьилтурал чурххардиву, дакIурдиву? «Ватандалийн кьини дуккайхту, хьувивав жула жагьилтураща га дуруччин?» тIисса суаллу тачIаввагу чан къашайхха. Вана дуруччин шайсса буну! На махIаттал хъанайгума ура, жула лакрал жагьилтурал дуллалисса яргсса чувшивуртту чIалай. Уттигу ца жагьилнал жан кьурван дурунни жухлура – Исупаев Леонидлул. Чувшиврия чагъарданий буслан бигьану бухьурчагу, дяъвилул цIараву му чувшиву дуван тIурча, агь, ца къабигьану бикIайхьунссарча!
Леонидлул нину Надежда 2-мур ЦIувкIратусса, ппу Рамазан Ккуллал шяравасса бур. Леонид увну ур 1994-ку шинал январь зурул 9-нний. Ванал школа къуртал бувну бур Ваччав. Бувккуну бур МахIачкъалаллал шяраваллил хозяйствалул техникумрал ветеринариялул факультет. Леонидлул оьрмулул шаттирдая ттухь бувсуна ванал ниттиуссил, Рамазанов Нураттиннул. Техникум бувккуну махъ Леонид къуллугъ буллай ивкIун ур Екатеринбурграй кьирийх бачай аьралуннаву. Яла тиккува авцIуну ур контрактникну.
Ва лавхъун ур сержантнал чиндалийн. Ивтссания, ванияргу лахъ хьунссия. Къуллугъ буллай ивкIун ур дачIи шинал мутталий Къарабахнавугу. Мартрал 17-нний, Киеврая арх дакъасса Ивановка тIисса шяравалличIа, командиргу гьантта икIайсса кIанайн иян увну, ганал шофергу, Леонидгу махъунмай нани ххуллий, машиналучIату тийнмай хьусса кIанай, чуврив пIякь увкусса снарядрал ххурххулул чIу бавну, га цачIанна лерххун нанишиву чIалай, цащалама кьус икIан увну, цува ганал ялун лавхIуну ур. Муххал парча цала ттиликIрахун щуну, Леонид га усса кIанттай къуртал хьуну ур. Ххассал увсса шофергу госпитальданий усса ур.
Мартрал 23-нний Леонид паракьат увунни буттал шяраву. Виричу ниттичIан иян уван ва паракьат уван ванащал увкIун ия аьрали хIаписаргу. Гьаттай махъгу лавхъун, Леонидлул чувшивриягу бувсун бия жяматрал хьхьичI. Леонидлун Чувшиврул орден дулунсса чагъаргу тIайла бувккун бур.
КIицI лаганну, Леонидлул нину Надежда, ниттиуссурвал Гъази, МахIаммад ва Нураттин яхъанайгу, зийгу бушиву Ваччав. Аьпа буваннав вил, лакрал миллатрал къучагъсса арс. Вил цIа личIантIиссар чувшиврул тарихрал ххуттай!
