Аьрасатнал ПаччахIлугърал Думалул депутат Джамаладин ХIасанов «Единая Россия» партиялул региондалул нюжмардул лагрулий ивунни ЦIуссалакрал райондалийн.

ЦIуссалакрал райондалул бакIчи МаматIи ХIамзатовлущал вайннал ххал бивгьунни райондалул агьамсса масъалартту. ЛяличIисса къулагъас дунни хасъсса аьралий операциялул гьурттучитурал кулпатирттал масъаларттах. Хьунабакьаврий мукунма ххал бивгьунни депутатнал ва «Сила в единстве» ДРОО-лул сипталийсса ва Дагъусттаннал бакIчи Сергей Меликовлул хъин чулий ккавксса «Истоки героизма» тIисса проект райондалий щаллу даврил масъала. Хъирив Джамаладин ХIасанов райондалул бакIчинащал увкIунни хасъсса аьралий операциялул гьурттучитурал кулпатирттавун ва барча бунни миннал ниттихъул байрандалущал.
Муниннин хьхьичI ванал гьан увссия цала кумагчи Керимхан Умаханов Донецкаллал ва Луганскаллал Республикарттайн гуманитар кумагращал ва тапшур бувссия тихун наниминнайн жула республикалиясса хасъсса аьралий операциялул гьурттучитуращал хьунабакьин.
Зана бивкIун махъ вайннал бувсунни жула аьралийтал ва командование ирглийсса гуманитар кумаграх барчаллагь тIий бушиву, мукунма тавакъю буллай бушиву нитти-буттах аякьа дан.
Мукун делегатътал бувкIунни ЦIуссалакрал райондалийсса ЦIуссалакрал шяравун, Оьмар ва Рукьижат Шайхаьлиевхъал кулпатравун. Барчаллагь увкунни хасъсса аьралий операциялий Ватандалул мурадру буручлачисса шама-шама арснах – Амирханнух, Мухтардух ва Расуллух. Нитти-буттахь бувсунни иш багьний чIарав бацIан, кумаг бан хIадурну бушиву.

Андриана Аьбдуллаева