Декабрьданул 8-нний Ккуллал райондалийсса Тахакьа АхIмадовлул цIанийсса Хъусращиял школалий хьунни вирттаврал аьпа абад буллалисса мажлис.
Ва кьини кIира аьпалул ула тIиртIунни хасъсса аьралий операциялий Ватандалул мурадру буруччаврил ххуллий чувшиврий жанну дуллусса Рафиджаннул арс МахIаммад Кусаевлун ва Славиклул арс Аьбдулхаликь ХIажиевлун. Аьпалул мажлисрай гьуртту хьунни ДР-лул аьрщарал ва хъуслил министрнал хъиривчу Эмил Ттаттаев, Ккуллал ва Лакрал районнал аьралий комиссар Аьли ГъазимахIаммадов, райондалул администрациялул бакIчинал хъиривчу Анатолий Давдиев, Хъусращиял шяраваллил бакIчи Арсен Алларазуев, Ветерантурал советрал хъунаманал хъиривчу, къуллугъ кьабивтсса майор, аьралий иширттал гьурттучи Щамхал Хизриев, райондалул идарарттал вакилтал, шяраваллил жямат, мачча-гъанми, дуклаки оьрчIру.
Мармарчарил улттая пардав дукьансса ихтияр дуллуна МахIаммадлул ва Аьбдулхаликьлул нитти-буттахьхьун.
Мажлис тIитIлай ихтилат бувна Щамхал Хизриевлул. Ванал цала ихтилатраву кIицI лавгуна талатавриву чувшиву ккаккан даврихлу МахIаммад Кусаевлул ва Аьбдулхаликь ХIажиевлун аьпалул хьуну махъ Чувшиврул орденну дуллушиву, барчаллагь увкуна къучагъсса арсру тарбия бувсса нитти-буттахь.
– ХIакьину жува бувкIун буру жула паракьатшиву дуруччаврил цIаний жанну дуллусса Вирттаврал цIарду абад дуван. Жула аьралийтурал исват бунни, иш багьний Ватандалухсса ччаву оьрмулияр ялтту дуккайшиву. МахIаммадлул ва Аьбдулхаликьлул жанну дуллуссар Аьрасатнал аьралийчунал хъалийн хаин къавхьуну, хIакьсса вирттаврал ххуллий. Вай хъанахъиссар Ватандалийн, билаятрайн дакI тIайласса, ялун нанисса никиран эбратрансса къучагътал, – увкуна Щамхал Алхулаевичлул.
Школалул директор ЩайхахIмад АхIмадовлул цала ихтилатраву кIицI лавгуна, Ватан ххирасса унгу-унгусса патриотътал тарбия баврил давриву хъунмасса бияла бушиву учительтурахь ва нитти-буттахь.
– Вай мудангу эбратну бикIантIиссар ялун нанисса никиран. Жагьилтал – жула бучIантIимурди. Миннал тарбиялухсса жулла къулагъасгу дикIан багьлай бур хъуннасса, хаснура Ватан ххирану тарбия баврих. Жула дусса язимур хъус – му Ватанни. МуницIун бавхIуну жул школалий хъуннасса къулагъас дуссар ялун нанисса ник Ватан ххирану тарбия даврил чулухуннай. Жулва буржри Вирттал дакIний битаву, – увкунни ЩайхахIмад АхIмадовлул. Хъирив ихтилат бувна Эмил Таттаевлул.
– Барчаллагьрай ура хIакьину вай кIиягу Виричу, вайннаяр хьхьичI аьпалул хьусса цаймигу дакIнин бичин бувкIсса цинявппагу инсантурайн. ХIайп, хасъсса аьралий операция уттигу къуртал хьун бувар, жула жагьилтуран Ватандалул мурадру буручлай жанну дулун багьлай бур. Ниттихъахьхьун ссавур дулуннав. Ватандалул мурадру буручлачисса цинявппагу аьралийтал цIуллуну-сагъну зана хьуннав ссавур дакъа цахва ялугьлагьисса ичIувациринначIан, – увкуна ванал. Къучагътурал оьрмулия бусласисса ихтилатру бувна дуклаки оьрчIал. Аьбдулхаликь ХIажиев увну ур 1994 шинал мартрал 8-нний Краснодардал крайрайсса Кущевский райондалийсса Объездная Балка тIисса хуторданий Хъусращиял шяравасса Славиклул ва Миражатлул кулпатраву. Дуклай ивкIун ур Раздольное тIисса шяравусса 23-мур школалий. Шикку бувккуну бур ванал 10 класс. 11-мур классраву дуклай ивкIун ур Хъусращиял школалий. 2018 шинал аьралий бурж бартбивгьуну бур Новочеркасскалийсса 3033-мур частьраву. 2022 шинал мобилизация баян байхту, цалчинминнавух лавгун ур хасъсса аьралий операциялий гьуртту хьун. 2023 шинал Аьбдулхаликь ивтун ур разведовательный отрядрал разведчик-пулеметчикну. 2024 шинал майрал 1-нний гьарица чулухунай итххявхсса, къучагъсса аьралийчу ивтун ур отрядрал хъунама разведчик-саперну. Ноябрьданул 11-нний ефрейтор ХIажиевлун чIивима сержантнал чингу дуллуну, ивтун ур 76-мур гвардиялул десантно-штурмовой дивизиялул разведбатальондалул командирну. Хасъсса аьралий операциялий гьалмахтурал ванайн позывной «Хан» учайсса бивкIун бур.
Талатавурттаву ккаккан дурсса чувшиврухлу лайкь хьуну ур «Участнику специальной военной операции», «Александра Суварова», «За отвагу» тIисса медальлан. Аьпалул хьуну махъ ванан дуллуну дур Къучагъшиврул орден ва «За заслуги перед Отечеством» VI-степени тIисса медаль.
МахIаммад Кусаев увну ур 2001 шинал июльданул 1-нний Хъусращиял шяраву Рафиджаннул ва Надирал кулпатраву. Школа къуртал байхту, дуклан увххун ур Дагъусттаннал Аграр-экономикалул техникумрал ветеринариялул отделениялийн. Аьралуннаву къуллугъ буллай ивкIун ур Бурятиянал республикалий. МахIаммад аьралуннава зана хьусса ппурттуву Украиннаву хасъсса аьралий операция баян буллай байбивхьусса чIун диркIун дур. Ватандалул ялун нигьачIаву дирсса чIумал, пикри къабувну, лавгун ур паччахIлугърал мурадру буруччаврил ххуллий талан. Зуруйсса аьралий хIадуршиннарду лархьхьуну махъ, гьан увну ур Украиннавун. Цалчинсса талатавурттаву ванайн кIусса щаву дирну, хъунмасса хIаллай хъин хъанай уссия. Ччаннай ацIайхту, цIунилгу аьралий гьалмахтурачIан зана хьуну ур. Хасъсса аьралий операциялий гьуртту хъанахъисса хIаллай, МахIаммадлул исват бувссар цува Ватандалул хIакьсса патриотгу, ялун нанисса никиран эбратсса къучагъгу, аьралийтурал вихшала дишин лайкьсса дусгу ушиву. Цала оьрмулун нигьачIаву дунугу, щавурду дирсса, аьпалул хьусса гьалмахтал дяъвилул цIарава буккан буллай ивкIун бур. Аьралий гьалмахтурал ванайн «чаннаннил дакI» дусса къучагъ учайсса бивкIун бур.
МахIаммадлул махъра-махъсса талатаву хьуну дур 2025 шинал июнь зурул 28-нний Донецкаллал Халкьуннал Республикалий Катериновка тIисса шяраву. Шикку аьралий бурж бартбигьлай къучагъшиврий жан дуллуссар ванал.
Къуллугърал бурж биттур буллай ккаккан дурсса чувшиврухлу МахIаммад Кусаев лайкь хьуну ур «За отвагу» медальданун ва аьпалул хьуну махъ ванан дуллуну дур Къучагъшиврул орден. Ванал махъ ливчIунни буттал лажин дакIний къаличIантIисса чIивисса арс. Аьралийтурал цIарду абад дуллалисса давуртту лайкьсса даражалий тIайла дуккан хъунмасса захIмат бивхьуну бия Хъусращиял школалул учительтурал ва дуклаки оьрчIал.
Мажлис къуртал хьуну махъ мероприятиялий гьуртту хьун бувкIминнахь барчаллагь увкунни МахIаммадлул ва Аьбдулхаликьлул нитти-буттал.
