Миллат чIивишиврух къабурувгун, яла чIявусса чиваркI лавгун бивкIун бур жула лакрава цала хушрай Буттал КIанттул цIанийсса Хъунмасса дяъвилул шиннардий Ватан душманная дуруччин. ЧIявур хIакьинугу Украиннал аьрщарай нанисса хасъсса аьралий операциялий цала хушрай яла цIу кIириний къучагъшивуртту ккаккан дуллалисса лакрал жагьилтал.
Хасъсса аьралий операция байбивхьуну цалчинсса зурдардийва лавгун, хIакьинунин Украиннал аьрщарай паччахIлугърал мурадру буручлай ур Карашрал шяраватусса Мусал ва Зубайдатлул арс Шяъван Жамалуттинов.
Аьралий иширттаву ккаккан дурсса къучагъшивурттахлу лайкь хьуну ур паччахIлугърал шанна ларайсса наградалун – Чувшиврул ордендалун, Жуковлул медальданун ва «За образцовое исполнение воинского долга» медальданун. Ттигъанну тIурча ванан дуллуну дур ца ттигу награда – «Дагъусттаннал халкьуннал Виричу» тIисса ларайсса цIа.
Ватан дуруччайманал кьини дунияллийн увксса Шяъваннул оьтту-ттурчIавура духьунссия Ватандалухсса ччавугу, къучагъшиврул гьавасгу, чувшивугу. Февральданул 23-нний дахьра оьрмулул 21 шин бартларгсса жагьилнал, гьунтти хасъсса аьралий операция байбивхьусса кьинива хIукму бувну бур ватандалул мурадру буруччаврил ххуллий талан гьан. Оьрму аьралий къуллугърацIун бахIинсса пикрилий ивкIун ур аьраличунал бурж лахълай унийва.
Дагъусттаннал паччахIлугърал университетрал юридический ва географиялул факультетирттай ккалаккисса студент, кIива курс къуртал байхту, 2021-ку шинал цала хушрай лавгун ур аьралий бурж лахъан.
Къуллугъ буллай ивкIун ур Камчаткалий 40-мур Краснодарско-Харбинский ЯтIул Ттугълил бригадалул хьхьирил пехоталуву (хасъсса аьралий операциялий Угледар, Попасная, Гостомель кIанттурду лавсун махъ, Аьрасатнал президент В. Путиннул ва бригадалун дуллуну дур «Гвардейская» тIисса цIа).
Аьралий бурж лавхъун махъ, тиккува ацIан ччай, контракт чичин, ацIилваксса рапорт буллуну бур. Амма, аьралийтал биялну бур тIий, контрактгу къачирчуну, зана хьуну ур шавай. ДачIи шиннарагу чIарах дукканнин, байбивхьуну бур Украиннал аьрщарай хасъсса аьралий операция. Шяъваннулгу, гавацIана батареялул командирначIан оьвкуну, бувсун бур цува ватандалул мурадру буруччаврил ххуллий талан хIадурну ушиву.
КIива барз медкомиссия буллайгу лавгун, майрай контракт чирчуну дур. КIира нюжмардий БТР-даний талансса хIадуршиннагу лархьхьуну, тIайла увккун ур хасъсса аьралий операция нанисса кIанттайн. Агьну ур та яла цIу кIирисса Угледардайн.
Тикку талай ивкIун ур дачIи шинай. Щаву дирну, госпитальлай хъин хъанай ивкIун ур. Цува хасъсса аьралий операциялийн най ушиву нитти-буттая кьюлтI бувну бур, гайннан кIул хьуну бур ва госпитальданий хъин хъанахъисса чIумал.
Реабилитациялия махъ, кIилчингу тихунай лавгун ур. Тани ванащал Ккуллал шяраватусса Магьдиев Мурадгу архIал ивзун ур. Га базилухь Шяъван пулеметрай ивтун ур.
«На усса расчетраву жу мукьа ияв: ттущал яручу, къумукь ва оьрус. Мукьагу дагъусттанчу цачIу икIаншиврул, ттун ччай бия оьруснахлу Мурад жучIана уцин. Амма мукунсса мутта жухьхьун Заннал къабуллуна. Ца гьужумраву ттуйн захIматсса щаву дируна, Мурад тIурча оьрмулуцIа хьуну ия. Дяъвилий аьралий гьалмахтурахсса ччаву куртIсса дикIайсса дур. Гайннал бакIрая чIара дагьаяр цува ивкIуну хьурдай тIий икIайсса ур. Мурадлул ниттил ттучIанма оьвчайхту, мукунсса асар ттул дакIнивугу бия», – дакIнийн бутлай ур Шяъван.
Ази лагайхту, цIунилгу тихунай авчуну ур Шяъван, чурххаву дукъарккун лирчIсса цIалцIивгу дунура. Ва базилухь аьралий частьрал хъунаманал, ттигу цIу кIиринийн тIайла уккан цIими хъанай бур тIий, Белгородрайн дазул мюхчаншиву дуручлан тIайла увккун ур. Тикку цал чIавама сержантнал, яла сержантнал чиндалийн лавхъун ур. Ца шин тиккугу дурну, тIайла увккун ур Курскалийн. Гъинттул хасъсса аьралий операция нанисса кIира ва дачIи шинал мутталий учIанагу цалчин игьалаган увкIсса Шяъван, кIивагу факультет къуртал бувшиврул дипломругу лавсун, цIунилгу хасъсса аьралий операциялийн зана хьуну ур. ХIакьину ва аьралий къуллугъ буллай ур Донецкаллал областьрай.
ДакIнийхтуну барча тIий Шяъваннухь ларайсса цIа, чIа тIий буру, ччясса мутталий хасъсса аьралий операциягу къуртал хьуну, вагу, жула цинявппа чиваркIгу сагъ-саламатну цала нитти-буттал, кулпатирттал ялун бувкIун ккаккаву!
Зулайхат Тахакьаева
