ХIакьину хасъсса аьралий операциялий Ватандалул мурадру бартбигьлагьисса аьралийтуравух чансса бакъар душру-хъамигу.

Ватандалийн кьини дурксса чIумал, ЦIуссалакрал райондалийсса ЦIуссаккуллал шяравасса Роза МахIаммадовал хушрай лавгун чирчуну дур хасъсса аьралий операциялий гьуртту хьунсса контракт.
Розал кIира шин дурну дур операцияртту-перевязкартту дайсса хирургиялул отделениялул медициналул роталул хъунмур медсестрану зий. КIусса щавурду, цIунцIияртту дирсса оьрчIру ххассал буллай, ванил буниялагу хъунмасса захIмат бивхьуну бур. Хасъсса аьралий операциялий гьуртту хъанахъиссаксса хIаллай, исват бувну бур цуппа нигь-ццах дакъасса, къучагъсса душ бушиву. ЦIуллу-сагъшиву хIура дуккаврийн бувну, Розан цуксса цинма къаччай бунугу, махъунмай бучIан багьну бур.
– ТачIав дакIния къабукканссар цайнна дурксса захIматсса кьинирду яхI-къириятрай лахълай бивкIсса аьралийтал, – тIий бур цуппагу.
ЦIана Роза зий бур ЦIуссалакрал райондалул азарханалий медсестрану. Шиккугу ва ца яла жаваблувмур ва къашайшалтраха аякьа думур зузала бур.
Ковидращал талатисса ппуртувугу Роза зий буссия яла нигьачIаву думурнин ккаллисса «ятIул зоналий». Ванил шиккугу лайкь бувссар къашайшалтрал чулухасса барчаллагьру.

Имара Саидова