ЦIуссалакрал райондалий ялугьлай бур канализациялул система цукун зий дурив ххал дан Краснодардая бучIантIисса пишакартурах.
Мунил ва цайми масъаларттал хIакъиравусса ихтилатру хьунни ЦIуминалий райондалул бакIчинал хъиривчу Амир Султановлул дурсса совещаниялий. Ххал бивгьунни кIицI лавгсса масъалартту щаллу бансса чаранну. «ЖКХ Новострой» идаралул директор Арслан Саидовлул бувсунни централизованный канализациялул сеть зузи дан­сса агьамми давуртту дуршиву. ЦIана система цукун зий дурив ххал дан Краснодардая пишакартал бучIаннин ялугьлай бур.
Сеть зузи даннин ци диялдакъашивуртту дурив кIул бан ччай бур. Ва бакъассагу, идаралул хъунаманал гьаз бунни инсантуран ва идарарттан щинал тарифру ккаккан даврил масъала. Юрисконсультнал балжину бувсунни предприятиялийн багьайсса юридий масъаларттая.
Совещаниялий мукунма ххал бивгьунни Дуккаврил управлениялийн багьайсса масъаларттугу: школалул бух хьусса автобус баххана баврил, кIулшивуртту дулаврил идарарттай магъив дакьин даврил ва хъунма хIал къавхьуну тIитIинтIисса гьайкаллал хIакъиравусса.
Амир Маликовичлул кIицI лавгунни вай масъалартту дузрайн буккан бан цинявппа хIала-гьурттуну зун аьркиншиву, так цинявннал цачIусса хIарачатрайну хьунтIишиву райондалул социал-экономи­калул даража гьаз бан.