«Единая Россия» партиялул сипталийсса «Парта Героя» тIисса щалагу Аьрасатнал кIулшивурттал проектрал лагрулий билаятрал цинявппа школардай дуклаки оьрчIахь буслай бур жула вирттаврая. Вай гьантрай «Парта Героя» тIитIлатIисса мероприятие хьунни Ккурккуллал школалийгу.
Ва хас дурну дия хасъсса аьралий операциялий къуллугърал бурж биттур буллай чувшиврий жан дуллусса, аьпалул хьуну махъ Аьрасатнал Виричунал цIа ларсъсса МахIаммад Исбакиевлун. Парталий дирхьуну дия Виричунал ва мунал наградарттал суратру, муная чивчусса кказит-журналлу.
– Бусалдаравун багьсса Дагъусттан. Аьрщинияр чувшиву ххишаласса», – куну бур цила чIумал политикалул ва жяматрал хьхьичIунсса ишккакку Надиршагь Хачилаевлул. Мяйжаннугу, жула Дагъусттан вирттаврал билаят бур. МахIаммад Исбакиев хасъсса аьралий операциялий Аьрасатнал Виричунал цIа ларсъсса 13-сса дагъусттанчу, 3-сса лаккучу хъанай ур, – увкунни мероприятиялул сакиншинначи, оьрус мазрал ва литературалул учительница Гульнара Магьдиевал.
Ванил бувсунни дуклаки оьрчIахь МахIаммад Исбакиевлул оьрмулия ва мунал чувшиврия. Хъирив дуклаки оьрчIал дурккунни назмурду, ккаккан дунни композицияртту.
ДакIнин бутан, Аьрасатнал президент Владимир Путиннущалсса хьунабакьаврий МахIаммадлун Виричунал цIа дулунсса тавакъю бувссия ванал аьралий гьалмахчу, хIаписар Денис Диденкол.
МахIаммад увну ур 1986-ку шинал Якутиянаву. Ванал ппугу аьраличу ивкIун ур, нину Марина байбихьулул классирттал учительница бур. Ва ЧукIуннал шяравассар.
МахIаммадлун 6 шин хьусса чIумал кулпат Москавлив бивзун, школа ванал тийх къуртал бувну бур.
МахIаммадлул диркIун дур каруннай бияврил ва спортрал гимнастикалул разряд. Гужну уккайсса ивкIун ур футболданий. Къуллугъ буллай ивкIун ур Новосибирскалий, Екатеринбурграй, Къазахъисттаннай. КIийла лавгун ур Сириянавун аьралий командировкардай. Лайкьну къуллугъ буллай ивкIун тIий, «За отвагу» медаль дуллуну дур.
Хасъсса аьралий операция байбишайхту, лавгун ур Ватандалул мурадру буруччин. Лайкь хьуну ур Чувшиврул ордендалун ва Жуковлул медальданун.
Октябрь зурул 15-нний Херсоннал областьрайсса Новокаменка тIисса шяраваллия арх бакъасса кIанттурдай чувшиврий жан дуллуну дур.
2024-ку шинал МахIаммад Исбакиевлун дуллуссар Аьрасатнал Виричунал цIа.
Андриана Аьбдуллаева
