Апрель зурул 26-нний «Молодежь Дагестана» кказитрал редакциялий хьунни «Университетские смены» тIисса Федерал проектрай ххув хьусса дуклаки оьрчIал ва региондалийсса «Движение первых» тIисса Советрал председатель Людмила Саидовал пресс-конференция.
КIицI ларгсса Федерал проект зузи дурну дур Аьрасатнал К1улшиву дулаврил элмулул, Аьрасатнал просвещениялул министерсварттал чIарав бацIаврийну.
Проектрал лагрулий 12 шинава 17 шинавун бияннинсса оьрчIру Аьрасатнал яла хьхьичIунми вузирдаву кIул буллай бур дуккаврил процессращал.
Гьашину Дагъусттаннал региондалий хьумур конкурсрай язи увгьусса 15 активист гьуртту хьунни «Движение первых» тIисса университетирттал сменардаву. Шикку гьуртту хьусса активистътал бивунни Москавуллал паччахIлугърал педагогикалул областьрал университетравун.
– «Университетские смены» тIисса федерал проектрал лагрулий дуклаки оьрчIан хъунмасса кумаг хъанай бур пиша язи бугьавриву. Му бакъассагу, дуклаки оьрчIал вичIи дирхьунни педагогикалул аралувусса машгьурсса экспертътурал лекциярттах, кIул хьунни вузравусса кIулшивуртту дулаврил процессращал, ххал диргьунни цалами кIулшивуртту, – увкунни Людмила Саидовал.
Бунни проектрал гьурттучитуран хас бувсса культуралул ва тарихрал объектру, музейртту, театрду ххал бигьлагьисса экскурсияртту. Мукунна дунни спортрал личIи-личIисса мероприятияртту.
«Университетские смены» проектраву гьуртту хьуншиврул хIасул бан аьркинну бур дуклаки оьрчIал дурсса хьхьичIунсса ккаккияртту цачIун дурсса портфолио. ХIадур дан аьркинссар «Моя траектория успеха» тIисса цIанилусса эссе, хьхьичIуннайшивурттая бусласисса видеоролик. Цимур-ца хIисавравун ларсун, язи бугьантIиссар «Университетские смены» тIисса проектраву гьуртту хьунтIисса дуклаки оьрчIру.
Хасавюртуллал райондалийсса Къарланюртуллал школалул 10-мур классрал дуклаки оьрчI Султан Къазахъовлул ва МахIачкъалаллал шагьрулул 52-мур гимназиялул 10-мур классрал дуклаки душ Виктория Фадинал бувсунни проектрал лагрулийсса Аьрасатнал хьхьичIунсса вузравунсса аьрххилиясса асардая.
– Ттун ххуй бивзунни студентътурал оьрму. На буруккинттарай буссияв цумур пиша язи бугьан хъинавав тIий, утти тIурчан, цалий бавцIура. Журналист хьунсса пикри цIакь хьунни, – увкунни Виктория Фадинал.
– Жу Аьрасатнал ттугълил рангирдайсса шанна командалийх бавчIуну, заданияртту ккаккан дурна. Жулмур командалун билаятрал тарих аьч бансса задание дуллуна, – увкунни Султан Къазахъовлул.
Шиккува кицI лаган, Аьрасатнал жагьилтурал ва оьрчIал суккушинна сакин дурссар 2020 шинал Аьрасатнал Президентнал хIукмулийн бувну. ХIакьинусса кьини ва суккушиндараву бур кIулшивуртту дулаврил 400-ннийн бивсса идарартту.
Людмила Саидовал бусаврийн бувну, гьашинусса шинал проектрал лагрулий дантIий бур 108 мероприятие.
