Гьар шинах кунма, гьашинугу Москавлив зума итадакьин ччими батIавансса чятир бивщуну бур Мемориал мизитрал чIарав, Поклон-Зунттуй. АцIунниха лирчусса шиннур «Рамазан зурул чятирду» бишлай Москавлив, 1500 инсан атIайсса ур миккун гьар кьини зума итадакьин. Ва даврил сиптачитал бур Москавуллал Бусурманнал рувхIаний управление ва Москавуллал ХIукумат. Ва, ихIсандалул проект дакъагу, культуралул проектгу хъанай дур, Къиримнал, Ингушнал, Дагъусттаннал кьинирдугу дувайну тIий.
[dropcap]М[/dropcap]арт зурул 31-нний, 500-нниха ливчусса инсанталгу бавтIун, дунни Дагъусттаннал кьини. Аьрасатнал Президентнал Москавливсса Дагъусттаннал Постпред Владислав Толстюклул, Дагъусттаннал хъунаманал ва цала цIанияту бавтIцири барча буллай, кIицI лавгунни гьашинусса «Рамазан зурул чятирданул» лозунг душиву «НасихIатшиву. Хъиншиврул эбратну ацIу», Аьрасатнаву педагогнал ва насихIатчинал шин баян бувну бухьувкун. Бувсунни Ухссавнил Ккавкказнаву дакьаву ва аслахIшиву ядавриву махъ нанисса динчитурал бияла хъунмасса бушиву ва исламрал гьанурду тарбиялуву кьиматрайсса чул бищай ттарцIруну хъанахъишиву. Ва мероприятиялий гьуртту хьунни Москавливсса Дагъусттаннал культуралул центрданул ва Мариян Илиясовал цIанийсса «Дараччи» фондрал Москавливсса филиалданул вакилталгу.
– Зума итадакьин цачIун батIаврилгу исват бунни жула агьали, цивппа чув бухьурчагу, цалва миллатрал культуралул ва диндалул аьдатирттал хIурмат буну къуццу тIий бушиву, – увкунни Мариян Кьаландаровал.
«Укун цачIун батIавриву, ккуркки лагавриву диялсса ххуйшивуртту ва хъиншивуртту дуссар, хайр-мюнпатрансса ихтилатру хьунни, агьали рязину ливчIунни тIий, хIакьинусса кьинигу чичлайнма бур ттучIан, барчаллагьри ва даврил сиптачитуран», — тIий чивчунни Дагъусттаннал хъунама Сергей Меликовлул цала Телеграм-каналданий.
Лакралмур ифтаргу дунни, Москавливсса ва Москавуллал областьрайсса агьлугу бавтIун, апрель зурул 2-нний. ХьхьичI кьини МахIачкъалаливсса лакрал ифтарданул хъуннасса хъар ларсъсса, ЦIуминалий имамну зузисса Мансур Хаваевгу гьуртту хьунни ваний. Ва ифтарданий Мансурдулгу, ихтилатру бувциринналгу кIицI лавгунни исламрал диндалул ххуллу-хха бурувччуну къуццу тIун аьркиншиву, жагьилтурал ва оьрчIал диндалул кIулшивуртту куртIгу, цIакьгу дуллан аьркиншиву..
