[dropcap]С[/dropcap]акиншиндарал комитетрал вакилтурал бувсмунийн бувну, ряхазарунниха ливчусса инсантал бавтIун бия. Цумур залданувун лагайссия вайксса лак укун хъунмасса мизитравун бакъасса? Цуксса къаххуйри ца миллатрал инсантал, оьрмулул хъуними, жагьилми, мюрщими, къуллугъчитал, захIматчитал, динчитал, интеллигенция, дурккуми, къадурккуми, аваданми, къааваданми личIи бакъа, ккуркки лагаву?

---

Аьдатрайн бувну, мероприятие дайдирхьуна мубараксса Кьурандалул аятирттайну. Мероприятие дачин дурну ия Азим Давыдов. БавтIцириннал хьхьичIун бувккун, ихтилат­ру бувна: Дагъусттаннал муф­­­тинал хъиривчу АхIмад Ма­хIаммадовлул, Лакрал райондалул имам МухIаммад Ссаламовлул, Гъумучиял имам Ансар Сулаймановлул, ЦIуминалийсса имам Мансур Хаваевлул, Ма­хIач­къалаллал № 49 школалул директор Аьбдулкарин Айгуновлул ва цаймигу бусравсса инсантурал.
ЧIяруя бавтIцириннансса бахшишру. Лях-карах тIий бия нашидру. Рамазан зурущал лакку мазрай барча буллалисса оьрчIал видеоролик дия. Медициналул клиникалул, рестораннал, ттучаннал чулухасса бахшишрал сертификатругу дия. ЧIивимур хIажлийнсса — оьмралийнсса путевкардал кIунурду бувккуну, тIайлабацIу хьуна тележурналист Карина Далиевангу, Кьубату ва ЦIущарния мархри нанисса Шамиллунгу.

Мансур Хаваевлул барчаллагь увкуна ва ифтар лавай­сса даражалий гьаншиврул ка-кумаг бувцириннахь. ЛичIинура кIицI ларгуна, зума итадакьинсса пулав бувансса ппиринжрахсса багьа буллусса, Мариян Илиясовал цIанийсса «Дараччи» фондрал цIа. Шиккува кIицI лаган, фондрал хъунмур Гульшан Хасаевал бувсунни «Дараччилул» душваврал сахаватну ка кIидархIушиву, дартIсса арцу дачIи ифтарданун кумагран дуллушиву, дачIи Украиннаву­сса иширттаву гьуртту хъанахъиминнан аьркинмур ласун дуллалишиву.
Утти ифтарданий гьуртту хьуминнал цаппарасса пикрирду:

Самрат Горчханова:
– На уттинин дурсса лакрал циняр ифтардай гьуртту хьу­ссара, ва шамилчинсса ифтар хъанай дунуккар. Шиная шинайн ванил даража гьаз хъанай бур, ялу-ялун агьалигу чIявусса батIлай бур. Шагьрулул зума-къирагърайсса, лага-бучIан къулайсса кIану бакъахьурчагу, чIявусса агьали бия. Ххари бувунна волонтёртурал дянив чIявусса оьрчIру бушаврил. Тарбиялул ца яла ххуймур кьяйдар оьрчIру ва давривух хIала бу­ххан буваву.

Рукьижат Мусаева (Буйнакск):
– На бувсса кьини дия ва кьини, на ттула уссур-ссуннахь увкуссия, оьрмулухун хъамакъаритансса кьини хьунтIиссар, жува циняв ифтарданийн гьарча куну. Шаппа цачIун бавтIунува бикIару, ифтарданий дур­сса дуаь личIиссар, агьалинал чIарав зумув бивхьусса ччатIул хъис барачатссар. Сант дагьну дунура, 1-мур ЦIувкIуллал шяраваллил агьлу чIявусса бивкIшивугу кIицI лаган ччива. Душру ва чиваркI хIисав бувну, чан бакъа, ца ххюцIала, ряхцIала инсан ухьунссия. Зумардугу итадаркьуну, чакругу бувну махъ, цачIунмай хьуну, ца ххуйну ду­ссухалугу буварду.

Саидат Кьурбанова:
– ТIайламур бусан, цалчинна на укунсса ифтарданий гьуртту хъанахъисса. Ссурвавращал бувкIра. Хъинниха жула диндалия кIулну бикIан, лак цаннан ца ххал хьун. Ххари бувунна лакрал имамтурал усттарну, пасихIну лакку мазрай бувсса ихтилатирттал. Инсан ххуйну ниттил мазрай гъалгъа тIутIисса чIумал, га ссая гъалгъа тIий ухьурчагу, вичIи дишин гъира бикIай. Имамтал Мансур Хаваевлул ва МухIаммад Ссаламовлул пасихIсса лакку мазрай бувсса ихтилат асар хьунни. ЯлунчIингу цачIун батIин цIуллушиву дулуннав!

МахIаммад-Расул Кьурбанов:
– Рамазан барз бусурманнансса дарсирдал барзри, мадрасар, школар. Зума дугьаврийну жунма, кьинилун кIийла бунугу, ччатIул касакрал ва щинал ххувлул кьимат гьаз хъанахъиссар, ва ифтаргу жула цашиврул лишанни. Ххаришиврул чанна лавхъсса симанну дур ва кIанай, Аллагьнайн вихсса инсантурал дакIурдил ххаришиву кувннайх кув дачIлай, ца ххуй­сса байрандалул асарду бур цинявннаву. Вайксса инсантуран ччатI бишинсса, укунсса даражалийсса мажлис бувансса даву бигьасса дакъассар, барчаллагь тIий ура, ва давриха зий, захIмат бивхьуминнахь, кумаграл ка кIидархIунахь.

Зарема Аьлиева (ш. Тула):
– На Тула шагьрулий бура зийгу, яхъанайгу. Укунсса ифтарданийгу цалчинна хъана­хъисса. Уттигъанну кунма, на кьамул бувунна Мариян Илиясовал цIанийсса «Дараччи» фондрал Москавливмур филиалданувун, ххарира мукун­сса тIайлабацIу ттунма шаврия. Бюххансса, бавтIцириннан асар хьунсса ихтилатру бия лакрал имамтурал, жяматийсса ишккаккултрал, динчитурал. ЧIявусса мюрщисса оьрчIру бия, кьатIувсса дякъия нигьа къабувсун бувкIсса бугьарасса агьлугу бия. БавтIцириннаву бия шанна-мукьра шинал мутталий мизитраву лябуккулий чIярусса давуртту дурну дур тIисса хаварду. Ва мизит баврицIун кабакьлакьи­сса цинявннанмагу барчаллагьри. Ва ифтарданул барачат ва цIуну буллалисса мизитравун бавтIсса цинявннал къатравун бухханнав. Жула миллатрал гьарца дайсса даврий барачат бишиннав! Ва ифтарданий дурцири дуаьрдугу Аллагьу Тааьланал кьамул дуваннав!

Суратру
Арсланаьли Сулаймановлул, «Ислам Лаккуй» порталданул администраторнал