[dropcap]М[/dropcap]арт зурул 23-нний «Дагестанская правда» кказитрал редакциялий хьунни 2023 шиналсса паччахIлугърал экзаменну дулаврийнсса хIадуршиннаран хас бувсса пресс-конференция.
[dropcap]Ш[/dropcap]икку гьуртту хьунни ДР-лул дуккаврил элмулул министр ЯхIъя Бучаев, Аьмсса кIулшивуртту хьхьичIуннай даврил управлениялул хъунмур Аймисей Акаева, РЦОИ-лул каялувчи Аскандар МахIаммадов, Дуккаврил ялув бацIаву дайсса управлениялул хъунама Шамил Оьмардибиров ва ЕГЭ-лул федерал эксперт Ирина Мирохова.
2023 шинал ЕГЭ дулунсса сияхIрайн лавсун ур 12784 выпускник, миннава 11 азара ур гьашину 11 класс къуртал бувсса. Экзаменну дуллан хIадур бувсса 64 пунктрай цимурцаннул дузалну бур 960 аудитория.
– Республикалул школарттайсса 30 % выпускниктурал язи дургьунни химиялул, биологиялул ва обществознаниялул экзаменну, 25% выпускниктурал – математикалул ва тарихрал экзаменну. ДакI ххари хъанай дур ларгсса шинаяр гьашину информатикалул экзамен язи дургьусса 150 выпускник ххишала шаврия. Мунищалва архIал хIайп учинсса иш хьунни гьашину физикалул экзаменну дуллалисса выпускниктал чан шаву. Инженертал хIадур байсса хасъсса кIулшивуртту дулайсса вузирдавун кьамул баншиврул тIурчан, аьркинну бур физикалул ва математикалул экзаменну дуллусса выпускниктал, – увкунни ЯхIъя Бучаевлул.
ОГЭ дулунсса сияхIрайн лавсун ур 41 210 дуклаки оьрчI, вайгу ларгсса шинаяр 6500 оьрчI ххишаласса. ОГЭ дулун хIадур бувсса 144 пунктрай 3000 аудитория бур техникалул оборудованиялул дузал бувсса.
Пресс-конференциялий ведомствалул каялувчинал кIицI лавгунни ДР-лул Дуккаврил ва элмулул министерствалул ва Виваллил иширттал министерствалул зузалтращал архIал ххал бивгьушиву экзаменну дуллалисса пунктирдайсса мюхчаншиврул масъалартту.
Дагъусттаннай ЕГЭ даврил ялув бацIаву дан бувкIсса Ирина Мироховал бувсунни цилла гьурттушиву дурсса, ккаккан дурсса чIумуяр хьхьичI дуллай бивкIсса оьрус мазрал экзамендалия.
– МахIачкъалаллал 22-мур лицейраву оьрус мазрал экзамендалийн бучIансса сияхIрай ивкIсса 126 инсанная экзамен дулун увкIунни 83 дуклаки оьрчI. Вайннаву хъунмурчIин бия ларгсса шинал экзаменну дуллай бивкIсса, гьашину вузирдавун бухханшиврул цалла хIасиллу ххуй даву ва лавайсса баллу ласаву мурадрай бувкIсса выпускниктал. КIицI лаганна сакиншинначитурал чулуха экзаменну наниссаксса хIаллай цукунчIавсса диял дакъашивуртту хIисав къархьушиву. Амма ца душ буккан бунни, шоколадрал чагъардануву телефон ларсун бувкIсса хIисав хьуну. Му буккан бунни балугъравун бивсса бушиву хIисавравун лавсун, дунни мунин административ дишалалул акт. Гьашинусса шинал сентябрь зуруйн бияннин ва душнихь ихтияр дакъассар цIуницIакул экзамен дулун бучIансса, – увкунни Мироховал.
Аскандар МахIаммадовлул бувсунни сакин дуршиву ЕГЭ ва ОГЭ дулаврил расписание.
Дагъусттаннай цалчинсса ЕГЭ дайдихьлахьиссар май зурул 26-нний ва ОГЭ – май зурул 24-нний.
