[dropcap]В[/dropcap]ай гьантрай МахIачкъалалив «ДИРО» (Дагестанский институт развития образования) ГБУ-раву хьунни личIи-личIисса дарсирдал олимпиадарттал республикалулми этапру. Шикку ни­ттил мазурдилмур олимпиадалий (лакку маз) цалчинсса кIану бувгьуминнавух бур Лакрал райондалийсса КIундиннал дянивмур даражалул школалул 10-мур классрал дуклаки душ Ибрагьимова Илада Геннадийл душ.

Муниципал этапрай ххув хьуну, региондалулмур этапрай гьуртту хъанахъисса дуклаки оьрчIал давурттан кьимат бишлай бивкIссар филологиялул элмурдал кандидат, ДГПУ-рал да­гъусттаннал мазурдил кафедралул доцент Римляна Сааьдулаева ва МахIачкъала шагьрулул 16-мур школалул лакку мазрал учитель ПатIимат Аьлиева.
– Жу давуртту ххал дуварду вай щаллу дурсса оьрчIал цIарду-бакIру къакIулну. ДакI дарцIуну тIий бура, жу жуйвасса бурж тIайлану ва марцIну щаллу був­ссар. Ва даву щилтагъшиву, даччин дакъа шаврил ялув хъинну бавцIуну бия «ДИРО» ГБУ-лул элмийсса ва методикалул отделданул хъунмур специалист Мариян ХIайдаровагу – цуппагу ххишала бакъа тIайлашиву ххирасса инсан, – тIий бур ПатIимат.

ЦIанасса жагьилтал дуккаврихух лавгсса, кIулшивурттал хъирив багьсса бакъар тIисса хаварду чIявуну баяй. Укун тIур­чангу, къачанни мяйжаннугу дуккаврихухгу лавгсса, цIу-цIусса кIулшивурттахгу мякьсса оьрчIру ва хасну КIундиннал школалийгу. Ши­кку, та-духьурчагу, хъуннасса къулагъас дуссар оьрчIан кIул­шивуртту дулаврих, вай ватан ххирану тарбия баврих. Ва кIанттул барашиннанугу хъанахъиссар ва школалул оьрчIал райондалул ва республикалул лагрулий ккаккан дуллалисса хьхьичIуннайшивуртту.
Лакку мазрал олимпиадалул региондалулмур этапрай гьуртту хьун бучIаннин ИладачIан цалархIал мукьра грамота дуркI­ссия.

Цалчинмур – школалий хьу­сса лакку мазрал олимпиадалий лахъсса баллу лавсун, Гъумук хьусса олимпиадалул муниципал этапрай 1-мур кIану бугьаврихлусса.
КIилчинмур – «Живая кла­ссика» конкурсрай хьхьичIун ливчуну тIий. Гьашинусса ва конкурс 12-мур хъанахъиссар. Иладал, школалулмур этапрай 1-сса кIану бувгьуну, Гъумук хьусса муниципал этапрайгу бувгьуссар 1-сса кIану. Шиккува кIицI лаган, уттинин цуппа гьуртту хьусса чIяру конкурсирттаву ва Иладан яла ххирамур дур.

Иладал ларсъсса шамилчинмур ХIурматрал грамота дур щалагу Аьрасатнал дуклаки оьрчIал «Роль деятельности Министерства внутренних дел в профилактике правонарушений среди молодежи» тIисса цIанилусса форумрайсса гьурттушиндарахлу­сса. Форум хьуссар ларгсса шинал ахирданий Гъумук, Ростов-на-Дону, МахIачкъала ва цаймигу шагьрурдайсса вузирдал юридический факультетирттал студентъталгу гьурттуну. ХIурматрал грамоталун бакъасса, ва форумрай Илада лайкь хьуссар 3-мур даражалул дипломрангу.
Мукьилчинмур дипломгу бур Иладал Республикалул «Второе дыхание родным языкам» цIанилусса конкурсрай дурсса гьурттушиндарахлусса, «ДИРО»-рал ректорнал цIаниясса.
Гьарцагу дарс ххуйну ла­хьхьайсса, дуккавривугу, низамравугу хьхьичIунсса Иладан хъиннура ххирар лакку мазралми дарсру (учитель – Шихлаева Абризат ХIасановна).
Лакку мазрал олимпиадалий бувгьусса 1-сса кIанугу, махъсса вайми наградарттугу барча тIий, чIа тIий буру Иладан ваниярдагу ларайсса хьхьичIуннайшивуртту. Ялугьланну Иладал цIу-цIусса ххувшавурттах.