[dropcap]М[/dropcap]арт зурул 28-нний Дусшиврул къатлуву хьунни «Дагестанская правда» кказитран 105 шин шаврин хас дурсса мероприятие. Шикку гьуртту хьунни Дагъусттаннал ХIукуматрал хъунама Аьбдулмуслим Аьбдулмуслимов. Премьер-министрнал цал ххал дунни «Дагестанский труженик» (хьхьичIра укунсса цIа диркIун дур) кказитрал архиврал номердал выставкалул экспозиция. Ванал микку къулагъас дунни «ЯтIул яруннищалсса инсантал» тIисса луттирахгу.
«Дагправдалул» хъунама редактор Бурлият Токболатовал бувсунни га цала кказитрал сотрудник Жабраил Аьлиевлул чивчусса лу бушиву, луттираву бувсун бушиву Октябрь революциялул цIанийсса каналданул тарихрая, цингу гьашину 100 шин хъанахъишиву.
Премьер-министрнал Сергей Меликовлул цIанияту бавтIцирив барча буллалисса ихтилатраву кIицI лавгунни «Дагъусттаннал правда» кказитрал республикалул тарих чивчушиву ва кказитрал цалчинми редактортурал цIарду хъамаритан къабучIишиву. Бувсунни цалчинма редактор Аьлибаг Тахо-Годи ивкIшиву. Кказитирттай ххуйсса макьалартту чичлай бивкIсса хьхьичIунминнавух кIицI лавгунни Саэд Габиевлул ва Гьарун Саэдовлул цIардугу.
Аьбдулмуслим Аьбдулмуслимовлул балжину бувсунни кказитрал республикалул оьрмулул иширттаву кьиматрайсса кIану бувгьушиву, хаснува революциялул хъиривсса шиннардий агьали дуккин баврил, культуралул ва просвещениялул кюртти хIасул буваврил масъалартту гьаз буллай бивкIшиву, бувсунни Буттал кIанттул цIанийсса Хъунмасса дяъвилул шиннардий кказитрал фронтрай хъанахъимуния хIакьсса информация бивкIшиву, мукунма захIматрал фронтрайминная, 18-20 ссятрай ччаннай бавцIуну зий бивкIсса захIматкашная буслай бивкIшиву. Гьаннайсса, кказитирттал лажинтирттай вирттаврал тарих гьарца чулуха ккаккан бувну бушиву, заманалул тарг, бущи чIапIай яхьуну бушиву. ХIакьинусса кьинигу республикалул оьрму сантирай ва лябуккулий хьхьичIунмай шавриву, рувхIанийсса ирс-ххазина ябавриву кказитрахь хъунмасса бияла бушивугу кIицI лавгунни. «Дагестанская правда» кказитрал коллективраща бювхъунни жулла республикалул публицистикалул ирс-ххазина, ягу бувну, гьаз буван», – увкунни премьер-министрнал.
Кказитрал коллектив барча бунни бусравсса цайми-цаймигу вакилтурал, парламентрал депутатътурал, культуралул ва магьирлугърал, жяматийсса ккураннал вакилтурал.
Аьбдулмуслим Аьбдулмуслимовлул паччахIлугърал наградартту дуллунни кказитрал коллективран. Республикалул ХIукуматрал чулухасса Барчаллагьран лайкь хьунни Бурлият Токболатова, ванил хъиривми – Ширвани Айгунов ва Эльдар Расулов, корреспондентътал – Надежда Тузова, Юрий Иванов, Жабраил Аьлиев. «Гьарцагу къуллугъчинал, учIисса чувнал, дагъусттанлувнал цIусса кьини дайдишаван аьркинссар «Дагестанская правда» ва цала миллатрал кказит канил бугьаврия», – увкунни ахирданий ХIукуматрал хъунаманал.
