Аьрасатнаву интнил призыв дайдишаврицIун бавхIуну (интнил призыврал кампания най дикIантIиссар апрель зурул 1-нния июльданул 15-ннийн бияннин), Дагъусттаннал БакIчи Сергей Меликов увкIунни Республикалул сборный пунктрайн.
Дагъусттаннал аьралий комиссар Дайтбаг Мустапаевлущал ва вице-премьер Рамазан ЖахIпаровлущал Республикалул БакIчинал ххал бунни пунктрал къатри, ихтилат бунни зузалтращал. Цалчинма-цалчин хъамаллурал ххал бунни медициналул пункт ва биометриялул ккаккан бувмур сияхIрай бишайсса комплекс.
Шикку, призывниктурал цIуллу-сагъшиврул тагьар ххал дурну, вайннахьхьун дулайссар цанна-цаннасса электрон карта.
[dropcap]З[/dropcap]узалтрал бувсунни тестру, термотерапиялул аппаратру ва цаймигу аьркин дагьлагьисса оборудование цачIара диялну душиву.
Хъирив Сергей Меликовлул ххал бунни дуки-хIачIия ва лаххи-ликкия дусса склад. Шичча дулайссар къуллугъ бан наниминнансса янна. Цинявппагу призывниктал дузал бансса янна диялну душиву бувсунни складрал хъунаманал.
Республикалул БакIчи мукуна ивунни Военно-врачебная экспертизалул центрданийн, ихтилат бунни хIакинтуращал.
С. Меликовлул ххал дунни уттубишайсса кIанттурдал ва сборный пунктрал штабрал тагьар.
ЦIанасса чIумал най дур призыврал кампаниялийнсса хIадуршинна. Апрель зурул 1-нния байбивхьуну, Республикалул сборный пунктрайн шагьрурдая ва районная бувцуну букIлантIиссар аьралуннаву къуллугъ байсса оьрмулувусса жагьилтал.
Шичча вай тIайла буккантIиссар къуллугъ буллан Аьрасатнал субъектирдайсса аьралий частирдавун, цIусса регионну личIаннин. Аьралуннаву къуллугъ бан бувцусса жагьилтал хасъсса аьралий операциялуву гьуртту къахьунтIиссар.
