Щалагу дунияллун Дагъусттанная, лакрая баян бувсса аслансса зунтталчу, цила икIайкунсса аьралуннал хIаписар, миллатрал пахрунугу, къювунугу хьусса жула Виричу НурмахIаммад ХIажимахIаммадов дунияллия лавгун шин хьунни.
Ванал суратирттайн я щувкун, ванаясса роликру ххал дуркун, ялу-ялун къащи хъанай, кьурчIи бизлай бур. Заннал гьарица чулуха дуллусса, бакI-чурх бювхъусса, аькьлу-кIулши ххисса, ас-намусрал увччусса, зунттул ца ххярахIала хьусса кунасса жагьил.
«Ккавкказуллал жинсру» тIутIиминнангу баянну бюхттулну билаятрал Президентнал «На дагъусттанчура, на лаккучура» учин увсса жула НурмахIаммад. ХIайп, цимилагу хIайп…
«Генетика» тIисса махъ чIявуну баяй медициналул зузалтрая. Бутталгу, ниттилгу чулуха ххаллилсса агьлу-авладрая ивзсса арс цамур куццуйсса икIангу къабюхъайва. Украиннал аьрщарай билаятрал мурадру буручлай, цалчин Аьрасатнал Виричунал цIа ларсъсса жула НурмахIаммадри хьусса. Цала къучагъшиврийну ванал бюхттул бунни Ккавкказ миллатрал агьлу, майшан кунни Дагъусттаннал чиваркIуннал къучагъшиву, яхI бушиву.
Гьай-гьай, гьарица ниттин кунма, Сапижатлунгу цIурттаяргу, цIардаяргу цила арс чIарав ччанссия. Ци банссар, аьраличунал пишалул бурж бур Ватан дуруччаву, дяъвилул цIараву хьхьичI ххуттай авцIуну, иш багьарча, жан дулаву.
ЗахIматсса щаву дирсса чIумалгу, ккулларду бухлаганнин кьянкьану талайгу ивкIун, махъра-махъсса граната пIякь учин дурну, цувагу, цува вив ласун кьаст лархIусса нацистъталгу литIун бувну, къучагъшиврий жан дуллунни жула НурмахIаммадлул.
Оьруснал театрдануву Ватан дуруччулт лахъа-хъун буллалисса мажлисрай НурмахIаммадлул ниттил Сапижатлул бувсса ихтилатрал цинявппа хъювссул буккан бунни. Ванил дурккунни шинал хьхьичI, февральданул 23-нний цила барча уллай, таначIан гьан дурну диркIсса, амма арснан дуккин кьисмат къархьусса барча аву.
«На барча тIий бура зухь, Ватан дуручлачиминнахь, цинявппагу жула чул бищай кIанттуну хъанахъисса чиваркIуннахь Ватан дуруччултрал кьини.
Арс, чIа тIий бура вин кьянкьашиву, чувшиву, аькьилшиву. Хьуннав тIий бура вияту вила кулпатралгу, вила пикрирдал ва хияллалгу цIаний ацIан шайсса, вила мукъул заллушиву дан шайсса инсан.
ЦIуллушиву дулуннав, оьрмулул ххуллий каши ххи даннав. Вила гъан-маччаналгу, дустурал ва даврил уртакьтуралгу пахрулунсса лайкьшивуртту ва ххувшавуртту чIяру даннав вил оьрмулуву».
– Вай ттула арсначIан чивчуну бивкIсса, амма танан буккин кьисмат къавхьусса махъру, на хIакьину хас буллай бура зун, цинявппагу Ватан дуруччултран, – увкунни НурмахIаммадлул ниттил.
ХIурмат бусса Сапижат!
Вил аьзизсса арс щалагу билаятрал арсри. НурмахIаммад жула аьмсса пахругу, аьмсса къювугур. Ванал цIа чувшиврул эбратну личIантIиссар жула тарихраву. Абадлий личIантIиссар ва жула дакIурдиву.
