Ларгсса нюжмардий Лакрал райондалий Ххюлуссуннал шяраваллил школалий хьунни Авгъаннава совет аьрал буккан бувсса кьинилун хасъсса батIаву.
Ва дачин дурну бия Залина МахIаммадова. Бат1аврий гьуртту хьуна бусравсса хъамалгу: Лакрал ва Ккуллал районнал аьралий комиссариатрал призыврал отделданул начальник Ажуб Юсупов, кIирагу райондалул Авгъаннал ветерантурал советрал председатель Аьбдулгъапур Оьмариев, авгъан дяъвилул ветеран Кирамуттин АхIмадов, Карашрал школалул директор Эмир ХанмахIаммадов, Ххюлуссуннал школалул тарихрал учитель АбутIалиб Аминов, Лакрал райондалул ЦЗН-лул вакил Сабина Хизиева ва м.ц.
Махъру лавхъуна хъамаллурал ва Ххюлуссуннал школалул директор Сагъир Акаевлул.
Ихтилатру буллалиминнал дакIнийн бивчуна дяъвилий гьуртту хьусса къучагътал, ветерантал: Ххюлусматусса СалихI Къунжуев, Шяпи Дибиров (аьпа биву), Буршаятусса Рамазан Аьбдуллаев. Ва кьини мажлисрайн СалихI ва Рамазангу бучIан аьркинссия, амма вайннаща бучIан къавхьуну бия.
Дуклаки оьрчIал хъинну ххуйну, дюхханну дурккуна авгъан дяъвилул вирттавран хас дурсса назмурду. Цинявнналагу архIал ххал дурна ва дяъвилиясса киносурат.
Гихунмайсса мажлис хьуна барачатсса ссупралух.
