[dropcap]В[/dropcap]ай гьантрай ЦIуссалакрал райондалул бакIчинал бигарду биттур буллалисса Сулайман Рамазановлул каялувшиндарай райондалий газ къабувцуну бивкIсса щархъавусса къатрачIан уква газ буцинсса программалул масъалартту ххал бигьлагьисса совещание хьунни.

Шикку гьуртту хьунни райондалул шяраваллал бакIчитал ва газрал отраслирдай зузисса пишакартал. Вайннал ххал диргьунни газ буцаврил программа иширайну зузи даврил тагьар ва райондалул газрал отраслилул даву сантирайн рутаврил масъалартту. КIицI ларгунни райондалул щархъавусса цаппара цIусса кIичIирттаву ва программа иширайну зузи давринсса дайшишрурду. Мукунна кIицI ларгунни щархъавусса газрал сетьру дух хьуну душивугу.

Сулайман Рамазановлул цала хъиривчу Султан ХIамзаевлущал ва шяраваллал администрациярттал бакIчитуращал ххал диргьунни щархъавусса газрал сетирдал тагьар.
– Газрал сетьрай аьлтту хьу­сса цинярда диялдакъашивуртту духлаган давриха цинявппа цачIуну зун аьркинссару. Уттинин салкьи хьуну бивкIсса масъалартту, ялув бавцIуну, щаллу бан аьркинсса бур. Социал газификациялул хIакъиравусса цIусса программалийн бувну, инсантурал къатрачIан бияннин уква газ буцин бюхълай бур.

Газрал сетьру низамрайн дуцаврил хIакъираву кумаг аьркинсса кIанттурду хьурчан, арцуйнугу, цамур куццуйнугу чIарав бацIан хIадурну буссар райондалул администрация, – увкунни райондалул бакIчинал.
Мукунма совещаниялул гьур­ттучитурал кIицI лавгунни райондалул агьалинал ишла бувсса газрахсса багьа булаврил даву низамрайн рутан багьлай бушивугу.

КIулну бикIаншиврул, социал газификация – му дур цIусса проект, Аьрасатнал Президентнал тIалавшиннарайн бувну щалагу билаятрай иширайну зузи дурсса. Инсантурал къатри бусса кIанттурдайн бияннин ва проектрал лагрулий хIукуматрал уква буцлай бур газ. Так аьркинну бур цала участокрайн бивну махъ къатравун газ буцинсса проектрах ва оборудование машан ласаврихсса багьа булун.