Февральданул 14-нний дунияллий хьунадакьай Эшкьи-ччаврил кьини ягу Мубараксса Валентиннул кьини. Му кьини дакIнил лавсъсса жагьилтурал ва душваврал цаннал цаннан бахшишру дувай: къюкIлил лишан дусса открыткартту, тIутIал кацIру ягу ттюнгъасса асарду дакIний чантI учин буллалисса лишанну.

Бусласаврийн бувну, ва хъун дакъасса байрандалул дайдихьу хьуну дур Терни тIисса Румуллал шагьрулия. Мугу диркIун дур билаятрай дяъвирду нани­сса, паракьат дакъасса чIун. Ва шагьрулий ялапар хъанай ивкIун ур Валентин тIисса чув адамина. Му, дяъвилийгу гьуртту хъанай, килисалул зузаланугу ивкIун ур. Дяъвилийн чиваркI биял къа­хъанай, саллатIтал аьралий иширттая махъаллил къахьуншиврул, Клавдий КIилчинманал хIукму кьамул бувну бур чиваркIуннан хъами дуцин къабучIи буллалисса. Цала пикрилий, эшкьи-ччаву хьусса ягу кулпат бусса аьраличу ччаврил хияллахух къагьаншиврул.

Аьралитурал тIурча, хIук­мулух къулагъас ча дайссия, аьзиз­миннущал хьунабакьин­сса умуд къакьукьлай, машварартту щашлай бивкIун бур. Валентин ивкIун ур романтик. Ганан саллатIтурай цIими хъанай, кьюлтIницIух ччаврил дургьусса дакIру цачIун дуллай ивкIун ур. ЦIансса хьхьурдай Валентиннул магьарду бишайсса бивкIун бур дакIнил дустуран.
КьюлтIницIух дуллалисса давуртту, ци-чулийгу, ялун къалирчуну къаличIайхха, аьралий хъунаманан кIул хьуну, баян бувну бур императорнайн. Ганалгу, хъиривлаяву къадурну, мугьлат бакъа Валентин аьс ан­сса амру чивчуну бур. Дуснакьгу увну, цIакьсса къарал бивтун бур. Дуснакьраву унувагу, Валентиннул ччаврил тура кьадиртун дакъар. Эшкьи-ччаву дурну дур къаралчинал Юлия т1исса душних. Танингу ва ччан хьуну ур. Цува аьс ан хьхьичI Валентиннул ЮлиячIан эшкьи-ччаврил чагъар чивчуну бур, къулбасгу дурну дур «Вил Валентин» тIий. Амма аьзизмуничIан ча­гъар язима аьс увну махъ бивну бур. Юлия оьрмул-оьрмулухун Валентиннуйн хаин къавхьуну бур. Ва инсантурал дакIурдийн асар биян буллалисса хавар дунияллийх ппив хьуну бур. Валентин аьс увсса кьинигу кIицI лаглан бивкIун бур эшкьи-ччаврил байранну – Мубараксса Валентиннул кьинину. ВаницIун бавхIусса бусаларду цикссагу бур, мяълумну кIулну бакъар цумур тIайлассарив.

ХIакьсса ччаву Заннал язиминнанни тIар дулайсса. Ччаврил кьини жучIара сийлий дакъанугу, эшкьи-ччаврил бусаларду цикссагу бур: ингилиснал «Ромео ва Джульетта», аьраб­нал «Лайла ва Мажнун», узбакIнал «ТIагьир ва Зугьра», лакрал «Маллай ва ПатIимат», «ХIажияв ва ХIавиват» ва мукунма цаймигу. Вай цачIун бувну бур ччаврил, оьрмулуву щалиххан къабивтнугу, абадлий ливчIун бур хIакьсса ччаврил лишаннуну.