Январь зурул 28-нний МахIачкъалалив Национал библиотекалуву хьунни «Справедливая Россия – Патриоты – за Правду» партиялул Дагъусттаннайсса отделениялул каялувчи увчIлачIисса конференция.
Шикку ия республикалул муниципалитетирттайсса 4100 член усса 54 партиялул отделениярттаясса 57 делегат. Конференциялул даву дайдихьлай, партиялул председатель Камил Давдиевлул балжину бувсунни шинал лажиндарай дурсса даврия, хаснува Украиннал аьрщарай нанисса хасъсса аьралий операциялуву гьуртту хъанахъисса аьралитуран бувсса кумагирттая.
Камил Давдиев каялувшиву дуллай ур Республикалий «Справедливая Россия» партиялул фракция сакин дурния шийнай хIакьинусса кьининин.
Партиярттаву кIилчинмур ххуттай дусса «Справедливая Россия- Патриоты – за Правду» партиялул хIакьинусса кьини хъуннасса жаваблувшиву ларсун най дур цинявппагу ва партиялувусса члентурахлу. ХIакьину Дагъусттаннай партиялуву ур 400 депутат, миннава 11 ур Дагъусттаннал Халкьуннал Мажлисраву гьуртту хъанахъисса.
Ихтилатру къуртал хьуну махъ, конференциялий, цIуницIакул чIурду буллуну, партиялул каялувчину увчIунни ДР-лул Халкьуннал Мажлисрал председательнал хъиривчу Давдиев Камил МахIаммадович. Му бакъассагу, региондалул отделениялул сияхIравун увчIунни 23 инсан, цIуницIакул сакин бунни контроль-ревизиярттал комиссия. БувчIунни Москавлив хьунтIисса «Справедливая Россия — Патриоты – за Правду» партиялул XII-мур съездрай гьурттушинна дансса делегатътал.
Шиккува кIицI лаган, Камил Давдиев каялувшиву дуллай ур Республикалий «Справедливая Россия» партиялул фракция сакин дурния шийнай хIакьинусса кьининин. Ванийнугу исват хъанай бур Камил МахIаммадович даву канилух дурксса, зунсса гъирагу, шавкьгу дусса каялувчи ушиву. Камил Давдиев увчIуну ур Халкьуннал Мажлисрал мукьилчинмур, ххюлчинмур, ряххилчинмур ва арилчинмур оьвчавурттал депутатну. Тамансса шиннардий каялувшиву дуллай уссия ДР-лул Халкьуннал МажлисрачIасса Миллатирттал дянивсса хIала-гьурттушиврул, жяматийсса ва диндалул цачIушивурттал иширттал комитетрай. 2016-ку шиная шийнай ДР-лул Халкьуннал Мажлисрал Председательнал хъиривчуну.
