Январь зурул махъра-махъмур кьини Дагъусттаннал ХIукуматрал хъунама Аьбдулмуслим Аьбдулмуслимов вице-премьер Нариман АьбдулмутIалибовлущал ивунни республикалул ВацIлул хозяйствалул комитетрайн.
Ванал бувсунни хIакьинусса кьини вацIлул фонд 530 азарда гектар душиву, Ухссавнил Ккавкказнаву яла чIявуми вацIри Дагъусттаннай бушиву ва вацIлул хозяйствалуву 600-нниха ливчусса инсантал зий бушиву. Бувсунни «Экология» проектрал лагрулий аьркинсса техника ва оборудование машан ларсшиву.
Шиная шинайн тIиссакссагу, дугьай хъуру чан хъанай душиврий чIурчIав дурну, ванал маслихIат бунни ва иширахгу къулагъас дуван, личIину маслихIат бунни Нугъайнал лесничествалул биялдарайсса, мархри, гьанна ххяххан буллалисса питомник цIу буккан буван ва микку терескен , жузгун тIисса ххяххияртту ххяххан дуллан, ми аьрщи къундалийн дуккан къаритайсса ххяххияртту дуну тIий.
Гихунмай Аьбдулмуслимовлул маслихIат бунни мурхьру бугьлагьаврил география гьарза-гьарта дуван ва ми давурттайн жагьилтал кIункIу буллан.
– ВацIраха зузиминнал сипталийну ва хIарачатрайну мурхьру бугьлагьисса «Хъамакъабитулул багъ», «ВацIа ябанну» тIисса акциярттай жагьилтал гьуртту хъанахъаврил миннавун тIабиаьтрахсса ччаву рутлатиссар, тIабиаьт ядан, дуруччин аьркиншиврул пикрирду цIакь хъанахъиссар, дуклаки оьрчIру, жагьилтал, бугьарами, гьаннайсса, мюрщи-хъуни гьуртту хъанан аьркинссар республика щюллишиврувун дахьлаган дуван, – увкунни ванал.
ВацIлул хозяйствалул комитетрал хъунама Вагьаб АьбдулхIамидовлул бувсунни вацIлул участокру пудратрай дулаврия ва арендатортуращалсса даврия, бувсунни вацIлул хозяйствалия республикалул ва федерал бюджетирттавун дучIаймур махъсса шанна шинал лажиндарай диялну лахъ хьушиву.
Ахирданий премьер-министрнал хьхьичIун ливчуминнан дуллунни наградартту.
.
