![](https://ilchi.info/wp-content/uploads/2023/02/image-31-01-23-10-29-e1675501579804.jpeg)
[dropcap]Я[/dropcap]нварь зурул 26-нний МахIачкъалалив, Редукторный поселокрай Лаптиевлул кIичIираву, газрал давление гьаз хьуну, цаппара къатраву цIу ларчIшиву баян бувна МЧС-рал пресс-службалул. Гассят интернетрай, социал сетирдай ппив хьуна балаллуща агьали ххассал бувсса инсантурал цIарду: гьинта куна щинал турбалийх лавай лавхъун, шамилчинмур зивулийсса квартиралува чIивисса оьрчIгу, оьрчIал нинугу ххассал бувсса Виталий Ивлевлул, ва газ пIякь къаучиншиврул, анаварну ттукI кьувкьусса Гъапуров Зурпукьаллул цIарду. Виталий Ивлев чIарах най ивкIун ур, Зурпукьал цIу ларчIсса вайра къатраву яхъанай ур.
Цува дунияллийн увксса, яни 58 шин хъанахъисса, кьини бувну бур Зулпукьардул ва гьунаргу. Цанна цалла оьрмулухун хъама- къаритансса бахшиш дурну дур. Баширдул арс Зурпукьал Читтурдал шяраватусса ур. Зурпукьаллуя буккултрахь бусансса мурадрай зума бахъайхтува ва ур: «На личIисса цичIар къадав, цIу ппив хьун къаритансса даву дував», – тIий. ХьхьичIун урувгсса, пахру-ххаралул кьанкь дакъасса ва инсаннал цала балжину бусанссар тIий буссияв та кьинисса иширая. Суаллу буллай, гуж-балагь гъалгъа тIутIи уван багьунни, гьарца ххуттал хъирив, лажинни, ури-чIюлу мабара тIий ия.
– Зурпукьал, буси, кутIанувагу, виятува буккултрахь. Ссаха зузисса, ци дуллалисса инсан ура, чув увссара, чув дуклай ивкIссара?
– Увссара на Читтурав, дуклай ивкIссара цал буттал шяраву, яла – ЧIурттащиял школалий. МахIачкъалалив Автодорожный техникум къуртал бувссар, амма ххуллурдал пишакар къавхьура, строительствалул давриву ура, нава заллусса чIири-хъунсса предприятие дур пластикрал чIавахьултту, нузру дувайсса.
– Кулпат, оьрчIру?
– Ттул кулпат Земфира Ххюлусматуссар, кIия арс ур, Гъапур ва Рустам.
– Лажинни, буси та кьинисса иширая, ина, гьанавиххи къавхьуну, анаварсса бущилий дуван аьркинсса даву дурну дия тIий бур циняв.
– ЦIу ларчIсса хавар шайхту, на чIаххуврал квартиралийн кьутIа тIий улувкьуссияв бусса чаралий. Цурдалусса къари яхъанай дуссар тиву, кьатIув дурккун, шарда дакъая, талихIиндаран, архну къаларгун, гивахра дия. Нуз тIитIайхту, пуркIуврал ва цIарал лама най бия кухнилия, газрал плита ччучлай дия. Газрал турбалучIансса-шланграчIансса ххуллу ласуншиврул хьхьичI дирхьусса мебель дукьан багьлай бия, дукьан шаймур дуркьун, гъагъари дурну, на газрал турба лавкьуссия, чIавахьултту ябивхьуссия. Ттун гассят бувчIуна газрал давление лахъ хьуну душиву, мугьлат бакъа кранну лакьин аьркиншиву, ттукI кьукьин аьркиншиву. Яла, анаварну кьатIувай увккун, ттукIрал рубильник хъит дурну, ттукI кьувкьуссия. Гивахсса цаппара къатри ттукIрал дузал буллалисса трансформаторгу левшссия, газрал циняв краннугу лавкьуссия. Гьаннайсса, щалва къатта пIякь къаучинсса чаранну ккавкссия.
– Зурпукьал, ина цIана паракьатну бусларчагу, та ппурттуву газ пIякь учин бюхъайхха тIисса вас-ццах бакъаяв?
– ТIайламур бусан, му чIумал инсантуран кумаг буван хьуния тIисса бакъа пикри къабувххуна. Ттуву бия анаварну кранну лакьин хьуния, ттукI кьукьин хьуния тIисса пикри. Ттущал архIал лечлай буссия ттула кIилчинма арс Рустам ва дуснал арс. Яла махъ бакIравун бувххуна, нава ивчIарча, ивкIуну икIанссияв, вайнналми оьрмурдугу нигьачIавривурхха бивкIсса тIисса пикри.
– Му хIалатраву ци буван аьркинссарив, масалдаран, трансформаторгума лещан кIулну лякъаву ва мукунма цаймигу затру мукун цIу ларчIсса чIумал ци дуван аьркинссарив, ттукIлил рубильникру кьатIув чув дуссарив… Вин миннул мухIлу-хIин ххуйну кIулну диркIун дур.
– На 1983-1985 шиннардий Къазахъисттаннай Державинск тIисса шагьрулий аьралий бурж биттур буллай уссияв. Тикку тамансса затру лавхьхьуссия, лавхьхьумур яла дакIний личIайхха. ТIайлассар, укунсса баларду ялун бивсса чIумал, чярхний бувсса кумаграчIан цичIар къадияйссар. Гьанавиххи къавхьуну, буван кIулну кумаг буван аьркинну бикIай. Таксса аварасса ппурттуву кув тамашалий бия, кув, чулийнмайгу бавцIуну, видеорду ласласисса бия. Виталий Ивлев (ва ислам дин кьамул дурсса оьрус миллатрал инсан ур) тIурча, мугьлат бакъа кумаг буван ххявххуна, паргалну, куклуну лавай лавхъуна, спортравугу итххявхсса ухьунссия. ИширачIан къаагьну инсаннал хIал кIул къашайссар учайхха, Виталий ккаккан бунни цува къучагъсса чув ушиву. Буван аьркинмур бувну махъ бакъа рахIатну ссихI къалавсхьунссия.
– Барчаллагь, Зулпукьар! Вил чувшиврунгу республикалул хъуниминнал багьавай кьимат бищунссар тIий, умудрай буру.
– Кьимат – агьали, ттучIанма гъан хъанай, барчаллагь тIутIавур. Ванияр лахъсса кьиматгу бакъахьунссар.