Вай гьантрай Дагъусттаннал паччахIлугърал техникалул университетраву хьунни щаллагу дунияллул халкьуннал дянивсса элмийсса конференция – «Билаятру. Мазру. Культура» тIисса. Ванил модераторну бия ДГТУ-лул кьатIаллил билаятирттал мазурдил кафедралул хъунмур, профессор, Аьрасатнал Федерациялул ларайсса кIулшиву дулаврил бусравсса зузала Нажават Абуева. Конференциялий гьурттушинна дуллай бия Аьрасатнал регионнал ва чил билаятирттал вузирдал вакилтал. Сиптачитуравух бия Дагъусттаннал Культуралул министерство, Аьрасатнал МИД-рал Дагъусттаннайсса представительство ва МГПУ-лул чил билаятирттал мазурдил институт.
ДГТУ-лул элмулулсса ва инновациялулсса буллалисса проректор ХIамид Ирзаевлул, вузрал хъуниминнал цIанияту гьуртту хъанахъими барчагу бувну, барчаллагь увкуна Сакиншиннарал комитетрахь ва уртакьтурахь. Дагъусттаннал культуралул министр Зарема Буттаевал цIаниятусса барча буллалисса адрес дурккуна ванил хъиривчу Марита МухIадовал. Ванил кIицI лавгуна миллатирттал культура мазурдийнугу хьхьичIуннай хъанахъишиву.
Конференциялий гьаз бувна литературалийн, культуралийн, мазурдийн багьлагьисса агьамсса масъалартту. КьатIаллил мазру лахьхьин буваврил кьяйдардая ва опытрая, ларайсса кIулшиву дулавриву лингвистикалул бияла хъунмасса бушиврия. Мазругу, культурагу, литературагу лахьлай, ахттар дуллай, элмийсса хъиривлаявурттал хIасиллая мюнпат бушиврия.
БавтIцириннал личIиссара гъирарай вичIи дирхьуна педагогикалул элмурдал кандидат, А.Тахо-Годил цIанийсса ДНИИ-лул оьрус мазрал ва литературалул секторданул хъунмур Миясат Муслимовал «Культурардал дахIаву дуллалисса форма хIисаврайсса художествалул таржума» («Художественный перевод как форма межкультурной коммуникации») тIисса докладрах. Ванил балжину бувсуна таржумалул захIматшивурттая, назмурду таржума дувайни, личIинурасса усттаршиву аьркинну душиву, кIицI лавгуна Дагъусттаннал шаэртурал назмурду таржума дувайни, оригиналдания архсса даражалий таржума дурну душиву, таржумачитал миллатирттал менталитет ва тарих ххуйну къакIулсса бушиврийн бувну. Бувна конференциялий ингилис мазрайсса докладругу.
Нажават Абуевал ахирданий, гьуртту хьуцириннахь барчаллагь тIий, кIицI лавгуна цуппа умудрай бушиву конференция миллатирттал дянивсса дахIаву цIакь дуваву мурадрайсса, цачIунмай буллалисса, кьатIаллил билаятирттал студентътурал культура ядаву хIисаврайсса даву хьунтIишиврий.
