Ватандалул Вирттаврал кьинилун хасну Каспийскалий, Ф. Аьлиевал цIанийсса Хъунмур библиотекалий (ЦБС), хьунни Аьрасатнал Виричу М. НурбахIандовлул цIанийсса «Буттал кIантту» тIисса жагьилсса патриот клубрал ирглийсса батIаву.

Ваний гьуртту хьуна «шагьру Каспийск» шагьрулул округрал администрациялул бакIчинал хъиривчув Казбек Демиров, шагьрулул бакIчиначIасса Хъунисриннал советрал председатель ХIанипа Жабраилов, Каспийск шагьрулул Афгъаннал Ветерантурал советрал председатель МахIаммадаьрип Якьубов, Культуралул, жагьилтурал политикалул, ФК-лул, спортрал ва туризмалул управлениялул начальникнал хъиривчув Наби Залов ва м.ц. Бусравсса хъамаллуравух бия Хъун дяъвилул ветеран Муса Багьауттинов, Аьрасатнал Виричув Энвер Набиевлул нину Суна Набиева ва жанну дуллусса аьралитурал щахъами.
БатIаву дайдирхьуна Аьрасатнал ва Дагъусттаннал гимнру щаллу баврийну. Хъирив ЦБС-лул директор Мадина Темировал увкуна:
– Буттал улклул Вирттаврал Кьини – ва укуннасса байран дакъар. Ва кьинилул жува пикри буллали буллан аьркин­ссару граждан жаваблувшиндарал, дикIайкунсса патриотизмалул гьанулу думунил ялув. Жунма къачIявуну кIулну бикIай билаятрал ва жула гьарцаннал цIаний виричувшивуртту дуллалиминная, жунма щаквагу багьлан къабикIай хIакьсса вирттал жула чIаравва – ца шагьрулий, хIатта ца подъездравугума – ялапар хъанай бушиврия.
Хъамаллурал махъру лавхъун махъ, цинявнналагу архIал ххал дурна ва байрандалул тарихрацIун дархIусса, ватандалул цIаний дурсса ва хIакьинугу дуллалисса виричувшивурттаясса видеоролик, дуклаки оьрчIал дурккуна вирттаврахасса наз­мурду, увкуна балайрду.