МахIачкъалалив, лак лакку мазрайсса диктант чичлачисса кьини, декабрь зурул 2-нний Москавлив, Аьрасатнал Федерациялул Президентнал Постпредствалий, чирчунни лакку мазрайсса диктант.
![](https://ilchi.info/wp-content/uploads/2022/12/image-06-12-22-11-21-e1671191027775.jpeg)
Ва даврил сиптачитал бия Москавливсса Дагъусттаннал Культуралул центр ва Мариян Илиясовал цIанийсса «Дараччи» фонд. Постпредствалул цIанияту бавтIцири барча буллалисса ихтилат бувна психологиялул элмурдал доктор, профессор Зоя Хановал.
Ванил кIицI лавгуна миллатрал маз ябаву мурадрайсса проектру ялу-ялун машгьур хъанахъаврийн хьул бушиву.
Культуралул центрданул президент, профессор Арсен ХIусайновлул балжину бувсуна гьашинусса диктант хас дурсса чичултрая, аьлимтурая: Саэд ХIабиевлуя, АбутIалиб Гъапуровлуя, Аьли Къаяевлуя, Мирза МахIанмадовлуя ва Сулайман Мусаевлуя. Бувсуна укунсса давурттал лакку маз гъурбатрайгу яшавриву чIиви-хъунсса бутIа бихьлахьишиву.
– Миллатрал оьмургу, хъинмургу, тарихгу къакIулну къуццу тIун къалайкьссар. Ва диктантрайн бавтIциригу миллатрал мазрах хъуннасса ччаву оьтту-ттурчIаву дусса инсанталли, – увкуна ванал.
Диктант чирчуна 35 инсаннал. Диктантраха зий бивкIминнал бувсмунийн бувну, диктант чивчуминнаву чIявусса бия ччянива Москавлив бивзсса агьлу. Ва иширавагу аьлтта чIалай бия вайннан миллатрал мазрах мякь бушиву, тарих, культура лахьхьин ччай бушиву. ВайнначIагу диктантрал текст Казбек Мазаевлул «Виратти» кьиссалувасса бия. Диктант дурккуна ва ххал дурна Дагъусттаннал филологиялул факультетрал лакрал отделениялул цалчинсса выпускница Басират Билаловал. Шиккува бусан, Басират, Москавливсса лакку оьрчIан лакку маз лахьхьин буллай, тамансса шиннардий зий буссия Культуралул центрданул сипталийну тIивтIусса бигьалагай кьинисса школалий.
Диктант дакъассагу, тарихрал, культуралул кIулшивуртту ххал дигьлагьисса викторинагу дия. Мероприятие дачин дурну бия хасну ва иширайнма Москавлив бувкIсса «Дагестан» ГТРК-лул лакрал редакциялул редактор, Дагъусттаннал культуралул лайкь хьусса зузала Тамара Закарьяева. ДукIугу Тамарал, Москавливсса диктантрайн бувкIун, чялишсса гьурттушинна дурссия.
Ванин Постпредствалул хъунаманал цIаниятусса Барчаллагьрал чагъаргу буллуна.
Диктантрал мажлисрал кIилчинмур бутIа культуралул программалия сакин бувну бия. Бувккуна шеърирду, увкуна балайрду. Цила ляхъан бувсса шеърирду бувккуна Ххадижат ЦIаххаевал. Лакку мазрал бучIантIимуний дакI цIуцIаву дусса инсантурал хIадур дурну дия миллатрал дукрардал сахаватсса урцIигу. Диктантрайн бавтIцири ва даву аьдатравун дагьанссар, шиная шинайн гьуртту хъанахъиминнал аьдадгу хъун хьунссар тIисса умудрай бия.
Диктантрай гьуртту хьусса, лакрал цIа ларгсса шаэр Мирза МахIанмадовлул душнил Людмила Мустапаевал «Илчилул» корреспондентнахь циламур пикри бувсунни:
– Тай гьантрай Москавлив буну, ттуйнгу оьвкуна диктантрай гьуртту хьун. Ххари бунна, дякъихгу къабурувгун, тамансса инсантал гьуртту хьун бучIаврил ва чIявусса жагьилмигу бушиврул. Диктантрал даву цурдагу лавайсса даражалий щаллу дансса хIарачат бувну бия муниха зий бивкIминнал, барчаллагьри дакIнийхтунусса. Ттун тIааьнну бия диктантрай ттула буттал оьрмулия, творчествалия бусласимуних вичIи дишингу, Москавливгу жула чичулт, аьлимтал хъамакъабитлай бушиву, миннал аьпа уттава буллалисса давуртту дуллай бушиву ккаккан. Диктант учирчагу, лакрал культуралул байран хIисаврайсса даву дия. Литературалия, чичултрая, мазрая бия гьануми ихтилатру, ниттил мазрайсса бия балайрду, дакI ххари дуванмур чIявуя.
Суратру: Постпредствалул