![](https://ilchi.info/wp-content/uploads/2022/12/ac2476e7-c1ce-4152-89b0-b1900d2fc744-e1671190649554.jpg)
Лакку мазрал диктантраясса асарду
Аьдатравун дагьсса лакку мазрал диктант гьашинугу хьунни МахIачкъалалив ва Москавлив. Диктантраясса цала-цала пикрирду, асарду буслай бия шикку гьуртту хьуми. Цинявппа рязину, ххарину бия лакрал дянив укунсса мероприятие хъанай тIий. ХьхьичIми шиннардих бурувгун, гьашину МахIачкъалалив диктантрайн бувкIми чанну бия. Бюхъай, диктант зузи кьини диркIун тIий бикIангу. ЧIявусса бия, давурттай буну, ччай бунува, бучIан къавхьунни тIий, хIайп тIутIиссагу. Чанну бия гьашину диктант чичин бувкIминнаву жагьилми. Ци чулийгу, МахIачкъалалив бикIу, Москавлив бикIу, лакку мазрайсса диктант чичлачаву, лакку мазрахсса къулагъас ххишаласса душиву жула маз буруччинсса ца чаранну ккалли бан бучIихьунссар. КIицI лаган ччива Москавлив лакку мазрал диктант чичин бувкIминнаву чIявусса бивкIшиву Разита Мусаевал сакин дурсса «Лакку билаятрал рухI» тIисса патриот ккурандалул члентал.
Вай гъирарай буслай бур лакку байрандалул загьир бувсса асардая.
Москавлив ДагъусттаннацIун, лакрацIун дархIусса цинярдагу мероприятиярдай чялишсса гьурттушинна дайсса «Лакку билаятрал рухI» ккуранчитурал ва ххуллухгу лажин кIялашиву дунни.
Разита Мусаева:
– Вай гьантрай Москавлив хьусса лакку мазрал диктант жула лак цачIун бансса, лагма лаган бансса хIуччану хьунни. Ва дия лакрал миллатрал, лакку мазрал савлугърал кьини. Диктантрал сиптачитуралгу, пикри дузрайн буккан бувналгу хъуннасса агьамшиву дусса, тарихраву личIансса даву дурссар. Москавлив ДагъусттаннацIун, лакрацIун дархIусса цинярдагу мероприятиярдай чялишсса гьурттушинна дайсса «Лакку билаятрал рухI» ккуранчитурал ва ххуллухгу лажин кIялашиву дунни. Ккурандалувасса ацIа инсанналгу чирчуссар лакку мазрайсса диктант. Вайннал хъуннасса гьурттушинна дурссар сакиншиннарал давурттавух. Диктант чичаврицIун, назмурду ккалай, балайрду тIий, чIюлу дунни лакку мазрал байран ттул ккуранчитурал.
Умуд бур шиная шинайн мероприятиялул даража гьаз хъананссар, гьурттучитал чIяву хъананссар тIисса.
ПатIима Аьбдуллаева (Фатима Лакия), шаэр-балайчи:
– На ца гъирарай лавгра Москавливсса лакку мазрал диктантрай гьуртту хьун. Муниярвагу ххарину, тIааьнсса асардал вибувцIуну бувкIра. Диктантгу чичав, ттула назмурдугу дуккав, балайрдугу учав. Диктант чичин Москавуллал архсса районная бувкIсса инсантал, хаснува жагьилми, ххал хьувкун, дакI пахрулул ва ххаришиврул дуцIлай дия. Хъиннува ххари хьура мероприятие ца диктант чичаврийну къуртал къашаврия. Сакиншинначитурал, гьарзат хIисавравун ларсун, лавайсса даражалий хIадур бувну бия лакрал мажлис. ДакIнийн бивчунни жула шаэртал, бувсунни миннал творчествалия. Диктант чирчуну махъгу, щябивкIун, цанная ца мякь къалиххавай, личIи хьун къаччай бивкIру.
Ххуйсса ихтилат бунни Тамара Закарьяевал, Мирза МахIанмадовлул душнил Людмилал. «Дагъусттан» МЦК-лул дуллалисса цинярдагу мероприятиярдай гьуртту шайсса медициналул элмурдал доктор Жаруллагь Ажуевлул, балайрдугу увкуну, цала чулуха жула вакилханалун аккордеонгу бахшиш бунни. Ва кьини Москавлив хьунни унгу-унгусса лакрал байран. Ххишала хьунни жула маз бухкъалаганшиврийнсса вихшалагу.
Ххадижат ЦIаххаева:
– Москавливсса лакку мазрал диктант лавайсса даражалий ларгунни. ЧIалай бия сакиншинначитурал хъунмасса захIмат бивхьушиву лакку байран лайкьну тIайла дуккан. ЧIяруми лакрал мероприятияртту МахIачкъалаливгума оьрус мазрай гъалгъа тIисса дикIай. Москавливсса диктантрай гьарица ихтилат, дурсса жуав лакку мазрайсса дия. ЦIанихсса лакрал шаэртурая бусласисса ихтилатирттайну байбивхьуна лакку мазрал мажлис. Гъирарай вичIи дишав цила бикIайкунсса, экьинанисса лакку мазрай бувсса Тамара Закарьяевал ихтилатрах. Асар хьунсса ихтилатру бунни Мирза МахIанмадовлул душваврал. Укунсса инсантал гьуртту шаврилгу мероприятиялул сий хъиннура гьаз дуллай дия. Ххуй бивзунни диктант чичин язи бувгьусса жула гьунар бусса шаэр Казбек Мазаевлул произведениялувасса парчагу. Ваних вичIи дирхьувкун Лаккуйн бивссаксса хьунна. Лагмара лакку дуниял тIиртIусса кунмасса иш бия. «Дагъусттан» МЦК-лул президент Арсен Буйдалаевичлул каялувшиннаралу лавайсса даражалий хIадур дурну дия ва мероприятие. Нагу буккав лакку мазран хас бувсса ттула шеъри. Уттинин цаннан ца къакIулну бивкIсса инсантал нукIувасса дустал кунма хIалану, цанная ца ща къалиххавай бия. Цинявппа шиккун лакку дукрардугу ларсун бувкIун бия. Барчаллагьри ва мероприятие лайкьсса даражалий тIайла дуккан хъунмасса захIмат бивхьусса Арсен Буйдалаевичлун, Разита Мусаеван, Зоя Ханован, Басират Билалован, Тамара Закарьеван ва мукунма цайминнангу.
Тамара МутIаллиева, «Олимп» лазерданул клиникалул каялувчи:
– Гьашинусса лакку диктант на чичав Москавлив. Бахтти хьунни нава тай гьантрай тийх бикIаву. ХьхьичIми диктантру на МахIачкъалалив чирчуссия. Таний мийксса чIявусса инсантал бияхха, щябикIансса кIанттурду бакъая. Гьашину МахIачкъалалив ци тагьар диркIссарив къакIулли. Москавливгу ттун вайннуярвагу чIявусса бучIанххива. Цукун бухьурчангу, сакиншинначитурал хIарачат бувну бия лакку мазрал диктантрал байран лавайсса даражалий тIайла дуккан. Умуд бур, вайннал ва даву ттиния тихуннайгу дяличIан къаританссар тIисса, шиная шинайн ванил сий гьаз хъанай, гьурттучитал гьарза хъананссар тIисса. Хъинну ччива диктант чичин жагьилмигу букIлай, ялун нанисса никирангу ва даврил кьадру-кьимат кIулну. ХIисав дарча, МахIачкъалалив бикIу, Москавлив бикIу, диктант чичин бувкIсса чIявуми бур 50-нния лирчусса шинал оьрмулувусса инсантал. Мероприятиялувух гьуртту хьун жагьилмигу кIункIу бансса чаран лякъин аьркинни. Ялагу, ттунма кIулсса инсантураву чIявусса бия диктантрая къабавсса. Сакиншинначитурахь маслихIат бавияв зурдардил хьхьичIва диктантрал реклама дуллай байбишин.
![](https://ilchi.info/wp-content/uploads/2022/12/5b40f0ee-054c-46d0-ba14-e37586e72714-e1671190753941.jpg)
ПатIимат МухIуттинова:
– Декабрь зурул 2-нний Москавлив хьусса лакку мазрал диктант чичин нагу лавгра. ЦичIав къадахчуну, ттущава ва мероприятиялий гьуртту хьун бюхъаврия хъинну рязину ливчIра. На гьашину цалчинна лакку мазрал диктант чичин лавгсса. Ххаллилсса мероприятие хьунни.
Ххуйъя мероприятие дачин дурсса Тамарагу, текст ккалаккисса Басиратгу. Ца авурну чIалай бия чалагъайртту дирчусса, миллатрал янналувусса жула душру. Укунсса диктантирттая, ттухьва цIуххирчан, хъунмасса мюнпат буссар. Диктант савав хьуну, ца уттигу сант дагьунни лак цачIун батIинсса, лакку мазрай махъ-ихтилатрай щябикIансса. Ва кьини шиккун бавтIун бия лакрал шаннагу райондалул шяраваллал вакилтал. Цал уттигу мукIру хьура жула дянив буниялагусса патриотътал бушиврий. Москавлив хьусса лакку мазрал диктант дакIний личIансса хьунни, тIааьнсса асардал вибувцIуну бувкIра.
Зоя Ханова, психологиялул элмурдал доктор, профессор:
– Дунияллул халкьуннал дянивсса тотальный диктантрал лагрулий Москавливгу хьунни лакку мазрал диктант. Москавливсса лак лакку мазрайсса диктант чичин букIлакIаву аьдатравун дагьну тIий на рязину бура. Ххаришиву дия бувцIусса залдания. ТIайлассар, чанну бия арамтал, чанну бия жагьилтал. Бюхъай, бучIан ччай бунува, сант къадагьну къабувкIссагу бикIан. ЧIярусса шиннардий Москавлив ялапар хъанахъисса жула инсантураву миллатрахсса ччаву яхьуну душиву, миллатрал байрандалий гьуртту хьунсса гъира бушиву, мугу ккалли бан бучIисса ишри. Москавливсса лакрал цал ттигу мяйжан бунни цивппа миллатрал культуралия, багьу-бизулия, аьдатирттая арх бувцун бакъашиву. Сант дагьну дунура, кIицI лагавияв, Москавлив дуллалисса Дагъусттаннал мероприятиярдаву лакралми ляличIинура ххуйну, низамрай, хьхьичIун-махъун къаруртун, ккаккан дурсса чIумуй лагайшиву. Ттунма хъинну асар хьунни Тулалия бувкIсса Зарема Икрамовнал АбутIалиб Гъапуровлул оьрмулия ва творчествалия бувсса ихтилат. Мероприятиялий гьуртту хьун увкIун ия Москавливсса Лакрал жагьилтурал цачIушиннарал каялувчи Жамалуттин. ДакI ххари хъанай дия жагьилталгу укунсса мероприятиярдавух хIала хъанай бушиврия.
Гьай-гьай, лакку мазрал байран жу дайдишарду лакрал гимнрайну. Мероприятие наниссаксса хIаллай тIивтIуну бия авадансса лакку дукрардал ссупра. Диктант чирчуну махъгу цучIав шавай анавар уклай акъая. Цаннах ца мякь бувксса кунма лакрал дуссухалу бувну щябивкIун бия. Ттун хъинну ччива ттиния тихуннай лакку мазрал диктантрал лагрулий чIярусса цаймигу лакрал мероприятияртту хъанай. Барчаллагьри ва байран лайкьсса даражалий тIайла дуккан гьурттушинна дурсса цинявннан. Лакку мазрал диктант миллат ххираминнал, хIакьсса патриотътурал хъуннасса къулагъасрайн ларсун дуссар. Ванил сий ялу-ялун хъунна хъанантIиссар.
Гулизар Башанаева, психологиялул элмурдал кандидат:
Диктант чичлачисса кьини на Лакку билаятрайн бивсса кунма бивкIра. Ца аьжаивсса рахIатшиву, аьчухшиву, ххаришиву дия дакIниву.
Диктант чичин хьхьичIгу, чирчуну махъгу увкунни лакрал гимн. Дагъусттанная ва байрандалийн Тамара Закарьяева, Мирза МахIанмадовлул душру бучIавугу ххуйну хьунни. Жула Ххадижат Ц1аххаевалгу, цила чивчусса шеърирду бувккуну хъиннура чIюлу дунни мероприятие. Ва дия цила дикIайкунсса миллатрал байран. «Дагъусттан» МЦК-лул ва «Дараччилул» вакилтурал бувсунни цIанихсса жула шаэртурая. Миннал оьрмулия, творчествалия чIявусса ттунма уттинин къакIулну бивкIсса затру кIул хьунни. Диктант чичин бувкIсса сайки цинявппа хъами, ттуява тIайла хьуну, никIалай чалагъайрттаву бия. Вайннулгу ляличIисса ххуйшиву дуллай дия.
ТIивтIуну бия лакку дукрардащалсса – Дагъусттанная бувкIсса хьхьахьхьари, къячIив, аьрайн гьавккуртту бивхьусса, ссупра. Москавливминналгу бувну бия бакъухъ, нахIу-нацIурду. Мякь къалиххавай вичIи дирхьуну бивкIру аккордеондалухун Жаруллагьлул, ПатIимал (Фатима Лакия) тIисса балайрдах. Цинявппа гьурттучиталгу миннацIун базлай бия.
ХIайп, диктант чичин бувкIминнаву чанну бия жагьилми.
Умуд бур ялу-ялун вайгу чIявусса букIланссар тIисса.