Вай гьантрай МахIачкъалаллал автомобильно-дорожный колледжраву шадлугърал даражалий ларгунни «ДакIнил макьан» тIисса цIанилусса Дагъусттаннал халкьуннал культуралул фестиваль. Ва хас дурну дия колледжрал 90 шинал юбилейран.
Колледжрал спортзалдануву тIивтIуну бия Дагъусттаннал миллатирттал майданну. ХIадур дурну дия авадансса программа.
Фестивальданий яла ябацIанмур, яла аваданмур майдан бия лакрал миллатрал культура, багьу-бизу ккаккан буллалисса.
Шиккува кIицI лаган, фестиваль лахъсса даражалий тIайла дуккан ччянива хIадур хьуну бия колледжрал педагогтал ва студентътал. Лакрал миллатрал культура, багьу-бизу ккаккан буллалисса майдан сакин бувну бия колледжраву хьхьичIунну зузисса жула пишакартурал: АьФ-лул элмулул ва просвещениялул хIурмат бусса зузала Фариза Сайпуллаевал, ДР-лул кIулшивуртту дулаврил хьхьичIунсса зузалт Диана Къаркъаевал, Асият Мусаевал, Шихамир МахIаммадовлул ва цаймигу педагогтурал хIарачатрайн бувну. Шикку дия лакрал ужагъирттай, багьу-бизулуву хьхьичIара ишласса, утти, нажагь дакъа, къалирчIсса матахI. Хъамаллурал хьхьичI тIивтIуну бия, дукьра-хIанттия тIайла хьуну, жалиндалул бакъухърайн бияннинсса, аслийсса лакку дукрардал ссупра.
Фестивальданий гьуртту хъанахъицири лавххун бия миллатирттал лаххи-ликкиялуву, ца даркьуну дия душру-хъанний бавахъал буттукьирттавасса цаннияр ца авурсса лачакру.
Фестивальданул жюрилул, лавайсса кьиматгу бивщуну, барчаллагь баян бунни байран хIадур дан бивхьусса захIматрахлу учительтурайн ва студентътурайн.
Шиккува кIицI лаган, уттигъанну, колледжрал педагогтурал, студентътурал ва вайннал нитти-буттал кумаграйну, 200-нния лирчусса посылкартту тIайла дуркссар Украиннайсса аьралий операциялуву гьуртту хъанахъисса аьралитуран.
