КIулсса куццуй, Дагъусттан Республикалул БакIчи Сергей Меликовлул къулбасращалсса хIукмулийну, 2022-ку шинал жулла республикалий ва ванил кьатIув кIицI ларгунни Дагъусттаннал халкьуннал шаэр Фазу Аьлиевал 90 шинал юбилей. Ва таварихрацIун дархIусса шадлугъирттал хIасиллу дуллалисса, Фазу Аьлиева дакIнийн бутлатисса батIаву хьунни Москавлив Литератортурал Хъуни къатраву.
Шадлугърай гьуртту хьунни Сергей Меликов цувагу.
Фазу Аьлиевая Федерациялул Советрал Председатель Валентина Матвиенкол увкумур бувккуна ванил хъиривчув Константин Косачевлул:
– Жулва билаятрай ва ванил кьатIув Фазу Аьлиева машгьур хьуссар, анжагъ ца шаэр хIисаврай бакъассагу, прозаикнугу, правозащитникнугу, оьрмулухсса бургаврил цилва хьхьичIунсса пикри бусса инсаннугу. Фазул хъунмасса захIмат бивхьуссар аьзизсса Дагъусттаннал литературагу, аьмну аьрасатнал маданиятгу хьхьичIуннай даврил ххуллий. Шаэрнал творчествалул ирс таржума бувну буссар дунияллул халкьуннал чIявусса мазурдийн, ванил чивчумур лайкь хьуссар паччахIлугърал ва литературалул ларайми наградарттан. Фазу ХIамзатовна, гьунар бусса бушаврицIун, бия аькьилсса ва личIлулсса инсангу. Ва дакIнийхтуну вихну бикIайва поэзиялул мукъул инсаннал дакI марцI дувайшиврийн, хъиншиврул ва чаннал дуцIин дувайшиврийн.
Хъирив махъ лавхъсса Сергей Меликовлул увкуна:
– ХIакьину жува циняв цачIун бувну буру Фазу Аьлиевал творчествалухсса ччаврил. Шикку тамаша бизанссагу цичIав бакъар, цанчирча Фазу Аьлиевал гьашиву къадайсса диркIун тIий цилва произведениярттаву, цинма хасъсса журалий, так цивувасса шаэрнал гьунар бишаврий. Фазу ХIамзатовнал ххаллилсса шеърирдал инсантурал дакIру гъили дуллай дур, яла хъинми ва чаннами асарду чантI учин буллай. Аькьилшиву, яргсса аькьлу, бюхттулсса патриотизм, жард къакуну Ватандалуха буллалисса къуллугъ, цилла дуллалимунивусса къучагъшиву, микIларчIсса дакIурдиву цIу лахъан бюхъаву, цIаран лавхъсса бакIру цила чIумуй бякъин буван шаву – вай цимурца так цIакьсса хъамитайпалущая дуван бюхъайсса. Халкьуннал шаэр Расул ХIамзатовлущал архIал ванища бювхъуссар щалла дунияллун Дагъусттан ккаккан буван, чIявумиллатру бусса жулва халкьуннал дакIурдил ххуйшиву ккаккан дуван, – увкуна ванал.
Фазу Аьлиевал арс, «Лезгинка» ансамбльданул каялувчи Жамбулат МахIаммадовлул барчаллагь увкуна цалла ниттил творчество ххирасса, ва дакIнийсса цинявннахьвагу.
– ЛяличIиссава барчаллагьрал махъру учин ччива Валентина Матвиенкохь, муданмагу ттула ниттил чIарав бацIлай бивкIсса, Дагъусттан Республикалул БакIчи Сергей Меликовлухь, ниттил юбилейрал сакиншиндарал комитетрай каялувшиву дурсса, Дагъусттан Республикалул культуралул министерствалухь – Зарема Буттаевахь, мукунма Дагъусттаннал ва Аьрасатнал Хъаннил союзирттахь, Фазу ХIамзатовнал юбилей кIицI лагавриву цалва чулухасса захIматрал бутIа бивхьусса гьарцагу инсаннахь. Жунма ххал шай школарттай оьрчIал Фазу Аьлиевал назмурду ккалай – цири дикIан бюхъайсса шаэр хъамакъаитаврияр ххуйсса?! Фазу мудангу сагънува бикIантIиссар жулла дакIурдиву.
