ЦIуссалакрал райондалий Шушиннал шяравусса кIичIираваллин дирзунни къуллугърал бурж бартбигьлай къучагъшиврий жан дуллусса Росгвардиялул кIанттул управлениялул «Ястреб-Каспий» СОБР-ал зузала полициялул капитан Муртаза Султановлул цIа.

Мероприятиялий гьуртту хьунни Дагъусттаннал БакIчи Сергей Меликов, Росгвардиялул кIанттул управлениялул хъунама полковник Александр Орехов, «Ятреб-Каспий» Дагъусттаннал СОБР-ал командир, полициялул полковник Запир Алискантов, ЦIуссалакрал райондалул бакIчи МахIаммад-ХIажи Айдиев, къучагънал гъан-маччами ва даврил уртакьтал.

– Муртазал лайкьсса оьр­му бувтссар. Ва ия кьянкьа­сса талатала, вихшала дишин бучIисса дус. Ванал жан дуллунни билаятрал мурадру буручлай. Муртаза абадлий дакIний икIантIиссар ванащал архIал зий бивкIминнан, ванал къучагъшиву эбратну хьунтIиссар жагьил­сса зузалтран, – увкунни Запир Алискантовлул.

КIичIираваллил чIирайн лархъсса аьпалул ула тIитIин вихшала дунни отрядрал командирнайн ва виричунал ппу Руслан Султановлуйн. Руслан Султановлул барчаллагь увкунни цала арснал аьпа абад буллали­сса мероприятиялийн бувкIсса цинявннахь.

Гьурттучитурал тIутIив дирхьунни аьпалул улттуцI, баян бунни минутрайсса пахъ багьаву.
Мероприятие къуртал хьуну махъ Сергей Меликов ва Александр Орехов хьунабавкьунни аьпалул хьусса зузалал кулпат­ращал.