Лакрал театр хIадур хъанай бур Расул ХIамзатовлул произведениярттаясса «Махъва-махъсса багьа» («Последняя цена») тIисса спектакльданул премьералийн.
Постановка бихьлай бур Аьра­сатнал Культуралул министерствалул ва «Росконцерт» идаралул кабакьулийну.
Инсценировка ва спектакльданул художествалул дузалшин хIасул дурну дур режиссер Дмитрий Павловлул.

– Москавуллал, Санкт-Петербургуллал ва билаятрал цайми шагьрурдал сахIнардай тIайлабацIу бусса режиссер дагъусттаннал тамашачитурангу ххуйну кIулссар, – тIий бур театрданул каялувчи Бадрижат МахIаммадхIажиева, ванаща тамашачи щихачIав къалавхьхьусса ябитаврийну хIайран ан бюхъайшиврийгу чIурчIав дуллай.

– Дмитрий Павловлуща бю­хъай художествалул творчествалул куртIнийн увххун, гива хIакьинусса кьинигу агьамсса масъала ласун. Дагъусттаннал ва Аьрасатнал халкьуннал пахрулун лайкьсса, кьулчинмур ттуршукулул хьхьичIунсса классикнал произведенияртту гьануну лавсъсса спектакль агьамсса ишну хьунссар Расул ХIамзатовлул шинал ва му театрданул репертуардануву хъуннасса чIумуй лахъи лаганссар тIий, дакI дарцIуну буру, – увкунни Бадрижат МахIаммадхIажиевал.

ЧIумущалсса ва наслулуща­сса шаэрнал жап, куртIсса ва шеърилугърал усттарсса ганал философийсса пикрирду, тIайлану ва аьчухну дуллалисса жавабру дур хIакьинусса кьинилуцIун даркьу­сса, жува тIайламунийн вихшала дишин буллалисса. Мунилгу исват буллалиссар Расул ХIамзатовлул шеърилугърал ирсирал агьамшиву ттизаманнул никирангу хъуннасса душиву.
Спектакльдануву тамашачитуран ккаккантIиссар чичул личIи-личIисса заманардай чивчусса проза ва шеърирду цукун кувннивух кув хIала бухлай буссарив.

Спектакльдануву гьуртту хъанай бур Дагъусттаннал лайкь хьу­сса артистал: Артур Абачараев, Зинаида Чавтараева, Муртуз ХIажиев ва мукунма тамашачитуран ххира хьусса артисталгу: Руслан Ларин, Ислам МахIаммадов, Жаннат Гянжиева, Ибрагьим Рабаданов, Рукьижат МахIаммадова, Азиза АхIмадова, Жамила Закарьяева.
Премьера хьунтIиссар октябрь зурул 24-нний (итникьини) 18.30. ссятраву.

Муния махъ Лакрал театр дакIний бур ва спектакль Дагъус­ттаннал ва Аьрасатнал шагьрурдайгу ккаккан бан.