Вава азарханалий, 5-мур зивулий, терапиялул отделениялий, бакIрайн багьуна медсестрану зузисса, КIулушацIрал шявасса Юсупова Марина Исмяиллул душ, цуппагу ттучIава ЧIурттащиял школалий дуклай бивкIсса. Ва бур цIанихсса лакрал шаэр Нураттин Юсуповлул арснал щар.

Хъинну ххари хьура, нара биологиялул дарс дирхьусса, хъинну хьхьичIунну дуклай бивкIсса Мариная медсестра хьуну лякъаврий.
Марина бур хьхьичIунсса категориялул медсестра. Бур даврил ххуйсса стаж. Ка кук­лусса Маринал бувсса ххалаххи асарвагу къашай, капельница кIуллагу къахьунну дишай. Уттуивхьуну кIилчинмур кьини Марина бувкIунни палаталувун, цихьрагу дакъасса да­къар.– Агь, ттул душ, Маринай, ва ци хIурматри ина ттуха буллалисса, тти на ва хIурмат ссайну лахъави,– тIий ура.
– Ина ци тIиссара, ХIусайн МахIаммадович. Инагуния бай­ссия жул ялув захIмат, дарс дихьлай, вилла жангу, чIунгу харж дуллай, – тIий бур.

Маринащал бия кIяла хялатравусса мува оьрмулул душ. – Вагу ттул дусри, ттущал зузисса ярудушри. На ттула учительначIан най бура увкукун, вагу бувххунни вичIан. Жу даврил цачIун бувсса дусталлу. Ванийн Исяева Аминат учайссар. Ванилгу медициналул училище бувккуссар. Жу 2010-ку шиная шийнмай цачIу зий буру. Жу кIивагу дежурный медсестрахъуллу. Ва даврий хьхьу ва кьини дайссар, – кунни.

Укун ххуйсса, кIива миллатрал душру, ца кулпатраву, ца тIул-тIабиаьтрай тарбия хьусса кунмасса бур, ца даврил дустал бувну бур, хъиннихха укун!
Я Аллагь, Маринай, Аминат, зуйн Заннал чири ликканнав, дакIнийсса мурадру барт- лаганнав!

ХIусайн Давыдов,
ш. ЧIурттащи