Вай гьантрай жулла республикалий хьунни Аьрасатнал Кьиблалул мюрщи миллатирттал культуралул ва аьдатирттал фестиваль-форум «Уттарасса аьдатру» («Живые традиции»).

[dropcap]Ф[/dropcap]естиваль-форумрал цалчин­сса шадлугъну хьуна «Дагъусттаннал мюрщи миллатирттал агъуллал, рутуллал, цIахъюрдал культуралул творчествалул коллективирттащалсса даврия» тIисса цIанилусса творчествалул лаборатория. Ванил давривух гьур­тту хьуна Дагъусттан Республикалул Композитортурал союзрал председатель Рамазан Фаталиевгу. Шадлугъ хьуна ДР-лул Художниктурал союзрал Выставкарттал залдануву. Шикку хьусса мастер-класс хас бувну бия Дагъусттаннал кьиблалийсса мюрщи миллатирттал балайрдал аьдатирттан. Шадлугърай мукунма гьуртту хьуна Дизайндалул, экономикалул ва правалул техникумрал, М.А. Жамаллул цIанийсса Художествалул училищалул, И. Шамиллул цIанийсса Ухссавнил Ккавкказуллал чIяру касмурдал гуманитар колледжрал студентътал.

[dropcap]Ф[/dropcap]естиваль-форумрал кIил­чинмур кьини хьуна халкьуннал канил пишардал выставка. Ваний гьуртту хьуна УнцIукIуллал, Ахъушиял, Къайтагъуллал, Буйнакскаллал, Сергокъалаллал, Хасавюртуллал, Дахадаевуллал, Сулайман-Стальскийл районнаясса, Каспийскалиясса усттартал ва Чачаннал ва Къарачай-Чаргаснал республикарттаясса хъамал.
Выставка тIитIлатIисса шадлугърай гьуртту хьуна Аьрасатнал Халкьуннал творчествалул къатлул директорнал хъиривчу Мери Русанова, ФАДН-рал паччахIлугърал политикалул миллатирттал арардалсса бувайсса управлениялул начальник Тимур Цыбиков, Дагъусттан Республикалул Халкьуннал творчествалул къатлул директор Марита МухIадова, ДР-лул Художниктурал союзрал председатель Кьурбанаьли МахIаммадов, искусствовед Татьяна Петенина ва м.ц.

[dropcap]Ф[/dropcap]естивальданул лагрулий мукунма хьуна «Ккавкказуллал чан миллатирттал этнокультуралул аваданшиву» тIисса цIанилусса конференциягу. Р. ХIамзатовлул цIанийсса Национал библиотекалий хьусса ва конференциялул давривухгу гьуртту хьуна Мери Русанова ва Тимур Цыбиков. Вайннал бакъасса, ихтилатру ялагу бувна оьрус миллатрал халкьуннал масъалартталсса буллалисса ДР-лул ХIукуматрал комиссиялул жаваблувсса секретарь Наталья Евсеевал, ДР-лул Миллатрал политикалул ва диннал ишир­ттал министерствалул управлениялул начальник МахIаммад Даитбековлул, ДГПУ-лул профессор МахIаммад МахIаммадовлул, туризмалул ва халкьуннал художествалул пишардал министрнал хъиривчу Анна Безруковал, Ингушнал паччахIлугърал университетрал доцент Хава Аьлиевал, РАН ДФИЦ-лул Тарихрал, археологиялул ва этнографиялул институтрал Дагъусттаннал тарихрал центрданул каялувчи Эльмира Далгатлул.

Ва агьамсса даврил сакиншиннаралсса бувну бия АьФ-лул Культуралул министерствалул, Аьрасатнал халкьуннал аслий­сса культуралул центр «В.Д. Поленовлул цIанийсса Аьрасатнал халкьуннал творчествалул къатта» ФГБУК-лул Дагъусттаннал Культуралул министерствалущал, Халкьуннал творчествалул къатлущал ва коммерческий дакъасса Автономный «Палитра возможностей» цIанилусса организациялущал цачIуну.

[dropcap]Ф[/dropcap]естивальданул шадлугъирттавух гьуртту хьуна Ингушетиянавасса, Адигеянава­сса, Къарачай-Чаргаснавасса, Къабардин-Балкьарнавасса, Ух­ссавнил АьсатIин-Аланиянавасса, Чачаннавасса, Аьшттарханнал областьраясса ва Ставрополлал крайраясса творчествалул делегацияртту.
Фестиваль-форум дайлиртIуна гала-концертрайну.