Дагъусттаннал Национал музейрал культуралул выставкар­тту дай центрданий Дагъусттаннал лайкь хьусса художник МахIаммад Дибировлул юбилейран хас дурсса «Противостояние» тIисса выставка тIиртIунни. МахIаммад Хасавюртлиятусса лаккучу ур. Ва оьрчIнийва суратру дихьлан гъирасса ивкIун ур, хъунама уссин ванал гьунар хIисав хьуну, Хасавюртливсса художествалул школалийн уллуну ур. Яла къуртал бувну бур Ленинградрай художествалул ва реставрациялул лицей. Ванан цанмагу тикрал буллан ххирасса куццуй, ва ур тархъансса художник. Республикалий ва машгьурну ур, гьунар бусса ушаврицIун, сивсусса, нигь дакъа­сса художник хIисаврайгу.

Уттинингу Дибировлул ххю­цIалунниха лирчусса выставкартту хьуну дур билаятрай. «Ванал искусство – дунияллух критикалул зумунусса ябитаву дур, оьккимур аьч бувну, муния ххуймур буван ччисса кьяйдалийсса дур. Ванал творчествагу жура-журану кIицI лаглан бикIай, жагь критический реализм хIисаврайсса, жагьгу социальный реализм, ягу политикалул реализм, актуализм», – тIий бур выставкалул куратор Жамила Дагъирова, художникнал агьалинахь учин ччимур суратирттайну учайшиврий чIурчIав дуллай. Выставкалун цIа дур «Данди ацIаву» тIисса. Художникнал цала тIийкун, «данди ацIаву – магьирлугъри, магьирлугъ тIурчарив, ярагъ бакъарча, лагма-ялтту нигь думунища буруччавур». |

Гьунар бусса художник магьирну данди ацIлай ур къаххуймунийн ва тIайла ба­къамунийн, цала яхIлил кьамул къабуллалимунийн. Мукунмунил муттаэ аьщуйн щун бувну, аьнтну буслай ур жухьва цала дакIнил хIужрардаву хъанахъимуния. Ванал дунияллухсса ябитаву, буруккинтту, пикрирду ва щугълурду ябишин буллалисса дуниялгу дур художникнал творчество. Жулла хьхьичIун дуккан дурсса суратирттайну ва жухьва буниялттунгу чIявусса экспертътурал къабусанмур ягинну буслай ур, цIитI дикIан дуллай дур цIаннал ва аьвамшиврул дуниял. Ялун ххигу бан, ва тачIав мурцIув лявкIуну ивкIсса художник акъар. Ванал пилчалул къяцIухьхьун биривну бур властирдал заллухъругу, хъуни къуллугъчиталгу, цIадурксса политикталгу. Цувама мудангу илкинну къуццу тIийгу, илкинну суратру дихьлайгу ивкIун ур. Уттигу бюхъулий ва щихачIав къалавхьхьусса лугъат-бущилий вава ххуллийх най ур.
МахIаммад Дибировлул выставка ххал дуван хьунтIиссар ноябрь зурул кьуннийнин.